Ukrayna Silahlı Qüvvələri Kremennayanın cənub-qərbində və şimal-qərbində lokal irəliləyişlərə nail olub.
Editor.az bildirir ki, bu barədə Ukrayna və Rusiya mənbələrinə istinadən Müharibə Araşdırma İnstitutu (ISW) məlumat yayıb. Bunun dekabrın 2-də baş verdiyi bildirilir. Qeyd olunur ki, Ukrayna Silahlı Qüvvələri Kremennayanın cənubundakı meşələrdə müəyyən irəliləyiş əldə edərək Krasnopopovkanın kənarına (Kremennayadan təxminən 10 km şimal-qərb) çatıb.
Bundan əlavə, Ukrayna əsgərləri bütün cəbhə xətti boyunca və Svatovo-Kremennaya şossesi ərazisində əks-hücum əməliyyatlarını gücləndiriblər. ISW hesabatı əlavə edir ki, işğalçılar Baxmut bölgəsində də minimal irəliləyişi davam etdirib və Avdiyevka-Donetsk bölgəsində hücum əməliyyatları həyata keçiriblər.
Svatovonun qərbində Ukrayna Silahlı Qüvvələri və işğalçılar ötən sutka ərzində lokal döyüşlər aparmağa davam ediblər. Analitiklərin hesablamalarına görə, Ukrayna hava hücumundan müdafiə sisteminin uğurlarına baxmayaraq, rus qoşunları hələ də Ukraynanın enerji infrastrukturu üçün təhlükə yaradırlar.
//Samir Qurbanov, Editor.az