“Bakı Dövlət Universitetindən (BDU) xaric edilmiş Mexanika-riyaziyyat fakültəsinin Mexanika ixtisası üzrə I kurs əyani tələbəsi Məhəmmədov Pərviz Əlipənah oğlunun məsələsinə bu gün yenidən baxılacaq”.

Editor.az xəbər verir ki, bu barədə BDU-nun İctimaiyyətlə əlaqələr və informasiya şöbəsinin müdiri Günel Orucəliyeva deyib.

O qeyd edib ki, P. Məhəmmədov BDU tərəfindən verilmiş müvafiq əmrlə 23 noyabr 2020-ci il tarixindən Universitet tələbələri sırasından xaric edilib. Lakin Pərviz Əlipənah oğlu Məhəmmədov Bakı Dövlət Universitetinin rektoru Elçin Babayevə ərizə ilə müraciət edərək bu əmrə yenidən baxılmasını xahiş edib:

“Bununla əlaqədar BDU rektorunun müvafiq əmri ilə komissiya yaradılıb. Komissiyanın qərarına 30 noyabr 2020-ci il tarixdə keçiriləcək BDU Elmi Şurasında baxılaraq müvafiq qərar qəbul ediləcək”.

Qeyd edək ki, BDU-nun yaydığı məlumatda bu il noyabrın 23-də Universitetin Mexanika-riyaziyyat fakültəsinin I kurs tələbədi Pərviz Məhəmmədovun tədris prosesi zamanı ali təhsil müəssisəsinin daxili nizam-intizam qaydalarını kobud şəkildə pozduğu, həmçinin şəhidlərimizin qanı ilə boyanmış, Ali Baş Komandanımızın rəhbərliyi ilə Şanlı Ordumuzun işğaldan azad edilmiş əzəli torpaqlarımızda qürurla dalğalandırdığı Azərbaycan Respublikasının Dövlət bayrağına qarşı təhqiredici hərəkətlər etdiyi, buna əsasən tələbənin universitetdən xaric edildiyi bildirilir.