Avstraliyada keçmiş uşaq baxıcısı 91 uşağa cinsi zorakılıq etmək, onları videoya çəkmək və sonra internetdə yaymaq iddiası ilə 1600-dən çox cinayətdə ittiham olunub.

Publika.az xəbər verir ki, təqsirləndirilən şəxs 2022-ci ilin avqustunda həbs olunub, lakin polisin araşdırma aparması və qurbanların kimliyini müəyyən etməsi bir il çəkib. İstintaqı aparanlar bunun indiyə qədər gördükləri ən dəhşətli hallardan biri olduğunu deyirlər.

45 yaşlı kişi 246 zorlama və uşaqlara qarşı 673 nalayiq təcavüz ittihamı ilə üz-üzədir. Ən ağır ittihamlara maksimum ömürlük həbs cəzası nəzərdə tutulub. O, həmçinin uşaqlara qarşı istismar materiallarının çəkilişinə və yayılmasına görə də yüzlərlə ittihamla üzləşir. Polis bildirib ki, təqsirləndirilən şəxs istismar hallarını qeydə alıb və onun elektron cihazlarında 4000 şəkil və video tapılıb. Cinayətin Kvinslenddəki 10 uşaq baxım mərkəzində, Yeni Cənubi Uelsdəki bir uşaq baxımı mərkəzində və adı açıqlanmayan xaricdəki bir ölkədə baş verdiyi iddia edilir.