Vladimir Putin yayda cəbhədə vəziyyətin köklü dəyişəcəyini gözləyir.

ABŞ prezidenti Donald Tramp Rusiyanın Sumiyə qanlı zərbəsini “səhv” adlandırsa da, Ukrayna cəbhəsindəki müharibə Rusiya lideri Vladimir Putinin planına uyğun olaraq inkişaf edir.

Editor.az xəbər verir ki, bu barədə CNN yazır. “Mənə dedilər ki, onlar səhv ediblər” – deyə Tramp Rusiyanın Suminin mərkəzinə raket zərbəsi endirməsini, o cümlədən mülki əhali arasında maksimum itkiyə səbəb olmaq üçün kasetli sursatların istifadəsini şərh edib.

Ruslar dəqiqliyi ilə tanınan “İsgəndər” raketlərindən istifadə ediblər. Bir anda iki raketin istifadəsi məqsədyönlü hərəkəti, həmçinin hadisə yerinə ilk gələn xilasediciləri vurmaq niyyətini göstərə bilər. Çətin ki, Kreml bunu “səhv” hesab etsin, çünki bu cür taktikalar adi hala çevrilib. Bəzi rus tərəfdarları Trampı bunun “səhv” hadisə olduğuna inandırmağa çalışmış ola bilər.
Hücum ABŞ-ın diplomatik səylərinin nəticəsiz olduğunu acı bir şəkildə vurğulayır. Sosial mediada Tramp Rusiyanın sülhə doğru irəliləməyə başlamalı olduğunu qeyd edib, lakin Rusiya neftinin alıcılarına ikinci dərəcəli sanksiyaların tətbiqindən başqa vaxt çərçivəsi və ya konkret nəticələr göstərməyib.
Prezident dəfələrlə oxşar bəyanatlar verib, mülki şəxslərə qarşı hücumları pisləyib, eyni zamanda, Krivoy Roqda oyun meydançasında doqquz uşağın bu yaxınlarda öldürülməsi kimi konkret cinayətlərə deyil, müharibənin ümumi faciəsinə diqqət yetirir.

//Samir Qurbanov, Editor.az