Ukrayna prezidenti Volodomir Zelenski Həmas-ın şənbə günü İsrailə hücumunun İsrail və ABŞ siyasətindəki əks-sədasının Ukraynaya hərbi yardıma təsir edə biləcəyindən narahat olduğunu bildirib.

Editor.az xarici mediaya istinadla xəbər verir ki, bu barədə Zelenski NATO müdafiə nazirlərinin toplaşdığı Brüsselə gözlənilməz səfəri zamanı deyib. Zelenski NATO müdafiə nazirlərindən ABŞ Konqresində Kiyevə yardımla bağlı müzakirələr aparılarkən Ukraynaya dəstəyini davam etdirmələrini xahiş edib.

Rusiyanın Ukraynanın elektrik stansiyalarını və enerji infrastrukturunu hədəf alması gözlənilən qış ayları yaxınlaşdıqca Zelenski Həmas-İsrail müharibəsinin ölkəsinin müdafiəsi üçün risk yarada biləcəyini bəyan edib: “Dünyanın başqa yerlərində faciələr baş verərsə, bölünə biləcək yalnız müəyyən miqdarda hərbi yardım var”.

//Gülnarə Abasova, Editor.az