Rusiya işğalçıları Zaporojye AES-in reaktor qurğularının damlarında atəş mövqeləri qurublar ki, bu da onların Ukrayna Silahlı Qüvvələrinin əks-hücumuna başlayacağı təqdirdə stansiya ərazisində döyüşməyə hazır olduqlarını göstərir.

Editor.az bildirir ki, bu barədə Britaniya kəşfiyyatının yeni hesabatında deyilir. Mart ayına aid peyk görüntülərindən Rusiya qoşunlarının altı nüvə stansiyasının reaktor binasının bir neçəsinin damında qum torbalarından hazırlanmış möhkəmləndirilmiş atəş mövqeləri qurduqları məlum olur.

Britaniya kəşfiyyatı bildirir ki, stansiyanın ələ keçirilməsindən bir il sonra bu, işğalçıların reaktor binalarından taktiki müdafiə planlamasında istifadə etmək niyyətinin ilk məlum sübutudur. “Rusiya çox güman ki, bu mövqeləri Ukraynanın böyük hücumu perspektivindən narahat olduğu üçün inşa edib.

Bu addım ZAES ətrafında döyüşlər olarsa, stansiyanın təhlükəsizlik sistemlərinin zədələnməsi ehtimalını artıra bilər”, – xülasədə deyilir. Britaniyalılar həmçinin hesab edirlər ki, əgər stansiya uğrunda döyüşlər piyada silahlarının istifadəsi ilə məhdudlaşarsa, “reaktorlara birbaşa fəlakətli ziyan vurmaq” mümkün olmayacaq – atom elektrik stansiyaları çox davamlıdır.

  //Samir Qurbanov,Editor.az