Rusiya nefti Avropa bazarına artıq Hindistanın neft emalı zavodlarında istehsal olunan hazır neft məhsulları şəklində daxil olmaqda davam edir.

Editor.az bu barədə Bloomberg-ə istinadla xəbər verir. Rusiya neftinin Avropaya birbaşa daşınmasına qadağa dekabr ayından, Rusiyada istehsal olunan neft məhsullarına isə fevral ayından etibarən qüvvədədir. Bununla belə, Avropa sanksiyaları heç bir şəkildə Hindistan kimi üçüncü ölkələrin neft emalı zavodlarında Rusiya neftindən əldə edilən neft məhsullarının Avropa bazarına tədarükünü qadağan etmir.

Bloomberg-in məlumatına görə, aprel ayında Hindistan Rusiya neftinin əsas alıcısına çevriləcək və eyni zamanda Avropanın son neft məhsullarının ən böyük tədarükçüsü olacaq. O, hətta Aİ-yə dizel tədarükü baxımından Səudiyyə Ərəbistanını da keçəcək.

//Gülnarə Abasova, Editor.az