Dişlərə diqqətlə qulluq edilməsinə baxmayaraq, dişləri fırçaladıqdan sonra tez-tez edilən bir səhv – diş məcunundan istifadə etdikdən dərhal sonra ağzı su ilə yaxalamaq kariyesin yaranmasına səbəb ola bilər.

Editor.az xəbər verir ki, bunu məşhur stomatoloq Pavel Lysenkov açıqlamasında bildirib.

Onun sözlərinə görə, müasir diş məcunu yalnız mexaniki təmizləyici vasitə deyil:

“Tərkibində diş çürüməsinin qarşısının alınmasında mühüm rol oynayan flüor mövcuddur. Fırçalama zamanı flüor diş minasının səthinə yerləşərək təsir göstərməyə başlayır: minanı möhkəmləndirir, remineralizasiyanı dəstəkləyir və dişləri turşulara qarşı daha davamlı edir.

İnsan dişlərini fırçaladıqdan dərhal sonra ağzını güclü şəkildə su ilə yaxaladıqda, flüorun böyük hissəsini yuyub aparmış olur və onun təsir göstərməsinə imkan vermir. Nəticədə dişlər təmiz qalsa da, ən vacib qoruyucu amillərdən birindən məhrum olur.

Stomatoloji baxımdan bu, əsas məsələlərdən biridir. Kariyesin yaranması yalnız diş ərpinin olması ilə deyil, həm də diş minasının demineralizasiyası ilə remineralizasiyası arasındakı tarazlıqla bağlıdır. Gün ərzində, xüsusilə yeməkdən sonra turşuların təsiri altında mina müəyyən qədər mineral itirir. Flüor isə həmin mineralların bərpasına və dişlərin möhkəmlənməsinə kömək edir”.

Mütəxəssis bildirib ki, əgər bu qoruyucu mərhələ mütəmadi olaraq ağız yaxalamaqla “sıfırlanarsa”, ümumi gigiyena yaxşı olsa belə, diş minası daha həssas hala gəlir:

“Bu səbəbdən zahirən ideal ağız gigiyenasına malik insanlarda belə yeni kariyeslər yarana bilər. Dişləri fırçaladıqdan sonra düzgün yanaşma isə fərqlidir. Diş məcunundan sonra qalan qalıqları tüpürmək kifayətdir, lakin ağzı su ilə yaxalamaq məsləhət görülmür. Aktiv maddələrin nazik təbəqəsi dişlərin üzərində qalmalı və bir müddət təsirini davam etdirməlidir.

Digər amilləri də nəzərə almaq vacibdir. Məsələn, tez-tez qəlyanaltı etmək, şəkərli içkilər qəbul etmək və ya ağız quruluğu kariyes riskini artırır. Lakin bu amillər olmasa belə, flüorun mütəmadi olaraq ağız yaxalamaqla uzaqlaşdırılması ümumi qulluq sisteminin effektivliyini azaldır.

Bəzən xəstələr ağızlarını yaxalamadıqları zaman ağızda “məcunabənzər” hiss yarandığını və bundan narahat olduqlarını bildirirlər. Belə hallarda qoruyucu təsiri azaltmayan az miqdarda su və ya xüsusi flüorlu qarqaradan istifadə oluna bilər”.

Lysenkov sonda vurğulayıb ki, dişləri fırçalamaq yalnız ərpi təmizləmək deyil, həm də diş minasını qoruyan mühit yaratmaq deməkdir. Əgər bu qoruma hər fırçalamadan sonra aradan qalxırsa, ən düzgün texnika belə tam effekt verməyə bilər.

//Gülnarə Abasova, Editor.az