“Mən illərdir ki, atamdan ayrı, öz ailəmlə yaşayıram. Amma o mənə rahatlıq vermir. Gah gəlib bizə gələn suyun qabağın kəsir, gah da mənə hücum edir. Sonuncu dəfə avqustun 10-da mənə yaxınlaşdı və maşınımın içinə bir sənəd atdı. Bunun nə olduğunu soruşduqda bildirdi ki, ona ayın axırına kimi 13 min manat pul verməliyəm. Əks halda traktorla evimi dağıdacaq. Mən onun sözlərinə əhəmiyyət vermədim”.
Bunu Musavat.com-a açıqlamasında 7 il erməni girovluğunda olmuş keçmiş əsir Dilqəm Əsgərovun oğlu Kürdüoğlu Əsgərov deyib. O bildirib ki, elə həmin gün atası axşam radələrində çayxanadan çıxarkən ikinci dəfə ona yaxınlaşıb və hücum edib:
“Saat 6 olardı, çayxanadan çıxan zaman camaatın içində üstümə gəldi və məni əlindəki dəmir boru ilə vurmağa başladı. İnsanlar çox çətinliklə məni onun əlindən aldılar.
Sonra isə o, Daxili İşlər Nazirliyinin 102 xidmətinə zəng etdi və mənim barəmdə şikayət etdi. Dedi ki, guya mən narkomanam, onu bıçaqla öldürmək istəyirəm. Həmin vaxt çoxsalı zərbələr aldığım üçün halım yox idi.
Təcili tibbi yardım gəldi, mənə sarğı qoyuldu. Bu vaxt polisdən zəng edib dedilər ki, barəmdə şikayət var. Bildirdim ki, təcili tibbi yardım maşınındayam, xəstəxanaya gedirəm, oradan çıxandan sonra polis idarəsinə gələcəyəm.
Xəstəxanada müayinə olunduqdan sonra polis idarəsinə getdim. Mənə dedilər ki, barəmdə 102 xidmətinə və Daxili İşlər Nazirliyinə şikayət olunub, guya narkomanam və onu öldürməklə hədələyirəm. Polislərə bildirdim ki, o insan şər-bötah atan biridir. Üzümdəki, qolumdakı, burnumdakı xəsarətləri göstərdim. Polislər baxıb həqiqətən xəsarət aldığımı gördülər.
Mənə şər atan bu şəxs həm mənə xəsarət yetirir, həm camaatın içində təhqir edir, həm də gedib polisə şikayət edir. Şəmkir Rayon Polis Şöbəsinin əməkdaşları məni Gəncə şəhərindəki Narkologiya Mərkəzinə apardılar, müayinədən keçirdilər. Məlum oldu ki, mən narkotik istifadəçisi deyiləm, onun dedikləri böhtandır. Halbuki vaxtilə onun özü narko-satışla bağlı tutulmuşdu, “bariqa” idi.
Polis əməkdaşları həmin ərazinin video-görüntülərini əldə etdilər. Şəmkir polislərinə təşəkkür edirəm, məsələni ciddi araşdırdılar. Kamera görüntülərindən aydın oldu ki, o insan mənə şərləyir, özü məni boru ilə vurur. Nəticədə onun barəsində cinayət işi qaldırıldı.
Əgər mən cinayətkar və ya narkoman olsaydım, mənə cinayət işi açılardı. Dövlətimizə və polis orqanlarımıza təşəkkür edirəm. Daxili İşlər Nazirliyi məsələni nəzarətə götürdü və açıqlama verdi ki, araşdırma aparılır. Araşdırmanın nəticəsində həmin şəxsə cinayət işi açıldı”.
Kürdoğlu qeyd edir ki, atasının Dilqəm əsgərov olmasından şübhə duyur: “Bu insan sosial şəbəkələrdə yazır ki, “Bu mənim oğlum deyil”. Polis idarəsində də etiraf etdi. Deyir ki, 1993-cü ildə onun oğlu olmayıb, guya məni 1993-də Cəbrayıl rayonundan ermənilər gələndə tapıb. Məsələni DNT analizinə qədər aparacağam. Bu sözlərdən sonra çox ağır psixoloji sarsıntı keçirdim. Fikirləşirəm ki, onun mənim valideynlərimlə intriqası olub, müharibə şəraitindən istifadə edib, onları öldürüb. Mənim 35 illik həyatımı yalan etdi. Onun ucbatından həyatım alt-üst oldu.
Şəmkirdə narkotik satdığı yerdə tutulmuşdu, bir neçə ay da buna görə onun arxasınca getmişdim. Həmin vaxt Rusiyada idim, Azərbaycana gəlib, onunla maraqlandım, arxasında durdum. 7 il də əsirlikdə olan zaman arxasınca süründüm, onun əsirlikdən qaytarılması uğrunda əziyyətlər çəkdim. İndi 7 ildən sonra azadlığa çıxmışam, dinc yaşamaq istəyirəm, amma məni ölümlə hədələyir. “Səni güllələyəcəyəm, atacağam” deyir”.
Kürdoğlu bildirir ki, D. Əsgərov onunla digər övladları arasında da nifaq yaradıb:
“Mənimlə onların arasına nifaq salıb. Şəmkirdə polislər, tanınmış şəxslər, müəllimlər ona deyirlər ki, “Ölümlü dünyadır, Dilqəm, düzgün iş görmürsən, yaşına yaraşmayan hərəkətlər edirsən, 67 yaşın var”. Amma faydası yoxdur, heç kimin sözünü eşitmir.
Mənim əmim Ağaəli, daha sonra digər əmimoğlanları ilə də yola getmir. Özünü dəli oğlan kimi aparır. Dilqəm Əsgəroun əlində qalmışıq”.