Çinin Tsinghua Universiteti alimlərinin apardığı yeni tədqiqat göstərib ki, yuxu çatışmazlığından sonra “itirilmiş yuxunu bərpa etmək” vərdişi erkən ölüm riskini azalda bilər.

Editor.az xəbər verir ki, nəticələr Nature Communications (NatCom) jurnalında dərc olunub.

Mütəxəssislər bildirirlər ki, yuxu çatışmazlığı ürək-damar xəstəlikləri riskinin artması, metabolik pozğunluqlar, sürətlənmiş qocalma və ümumi ölüm riskinin yüksəlməsi ilə əlaqələndirilir. Yetkinlər üçün gecə ən azı 7 saat yuxu tövsiyə edilir.

Lakin yeni araşdırma göstərir ki, yalnız ümumi yuxu müddəti deyil, orqanizmin yuxusuzluq dövrlərindən sonra “bərpa olunması” da mühüm rol oynayır.

Tədqiqatçılar UK Biobank layihəsində iştirak edən 85 000 nəfərdən toplanmış 574 000-dən çox gecəlik yuxu məlumatını analiz ediblər. İştirakçılar yuxu müddətini ölçmək üçün biləyə taxılan sensorlardan istifadə ediblər.

Orta hesabla iştirakçılar gecə təxminən 6,4 saat yatıblar. Təxminən 30% insanlarda müvəqqəti yuxu məhdudiyyəti qeydə alınıb. Bu şəxslərin yarısına yaxını növbəti gecə yuxusunu təxminən 1 saat artıraraq kompensasiya edib.

Analiz nəticəsində məlum olub ki, yuxu çatışmazlığı yaşayan, lakin bunu bərpa edə bilməyən şəxslərdə 8 il ərzində erkən ölüm riski təxminən 15% daha yüksək olub.

Bunun əksinə olaraq, yuxu çatışmazlığını növbəti günlərdə kompensasiya edən insanlarda erkən ölüm riski, ümumiyyətlə kifayət qədər yatan şəxslərlə oxşar səviyyədə olub.

Tədqiqat müəllifləri bildirirlər ki, bu araşdırma müşahidə xarakterlidir və birbaşa səbəb-nəticə əlaqəsini tam sübut etmir. Lakin nəticələr göstərir ki, bərpaedici yuxu orqanizmin qısa müddətli yuxu çatışmazlığının təsirlərini azalda bilər.

//Gülnarə Abasova, Editor.az