Albaniyada ABŞ Prezidenti Donald Trump-ın kürəkəni Jared Kushner ilə əlaqələndirilən dəbdəbəli sahil kurortu layihəsinə qarşı kütləvi etirazlar davam edir.

Paytaxt Tirana şəhərində minlərlə insan küçələrə çıxıb, polis isə bəzi aksiyaları su şırnaqları ilə dağıdıb.

Layihə Adriatik sahilində yerləşən Sazan adası və Vjosa–Narta qoruğu ətrafında həyata keçirilməlidir. Ekoloqlar və yerli sakinlər hesab edirlər ki, təxminən 1,4 milyard avro dəyərində olan bu tikinti flaminqoların, dəniz tısbağalarının və digər nadir canlıların yaşayış mühitinə ciddi zərər vura bilər.

Etirazçılar hökuməti təbiətin və milli maraqların xarici investorların maraqlarına qurban verilməsində ittiham edir. Aksiyalar zamanı “Albaniya satılmır” şüarları səsləndirilib.

Albaniya hökuməti isə layihənin ölkəyə böyük investisiya, yeni iş yerləri və turizm gəlirləri gətirəcəyini bildirərək onun davam etdiriləcəyini açıqlayıb. Bununla yanaşı, layihə ilə bağlı qanunvericilik dəyişiklikləri və torpaq məsələləri üzrə araşdırmalar da başlanıb.

//Samir Qurbanov, Editor.az