Ermənistanın Baş naziri Nikol Paşinyan dekabr ayında Rusiyaya üç ayrı səfər etməyi planlaşdırır. Səfərlərin əsas məqsədinin Moskva ilə danışıqlar aparmaq olduğu bildirilir.

Bu barədə Ermənistan mətbuatı məlumat yayıb.

Paşinyan dekabr ayı ərzində Rusiyaya dekabrın 3-də, 11-də və 22-də səfər edəcəyini açıqlayıb.

“Dekabrda üç dəfə Rusiyada olacağam. Danışıqlar üçün üç səfər edəcəyəm – dekabrın 3, 11 və 22-si”, – deyə Ermənistan hökumətinin başçısı bildirib.

Baş nazir əlavə edib ki, Ermənistanla Rusiya arasındakı münasibətlərdə dostluq mühitinin qorunub saxlanılacağına ümid edir.

Qeyd edək ki, Paşinyanın bir ay ərzində Rusiyaya üç səfər planlaşdırması İrəvan-Moskva münasibətlərinin hazırkı mərhələsi baxımından diqqət çəkir. Son illərdə iki ölkə arasında bir sıra məsələlər üzrə fikir ayrılıqları yaranıb. Ermənistanın xarici siyasət istiqamətində yeni tərəfdaşlarla əlaqələrini genişləndirməsi fonunda Rusiya ilə dialoqun davam etdirilməsi İrəvan üçün aktual olaraq qalır.

Dekabr ayına nəzərdə tutulan görüşlərin gündəliyi və müzakirə olunacaq məsələlər barədə isə hələlik ətraflı məlumat verilməyib.

Musavat.com