Üzgüçülük narahatlıq, xroniki stress və depressiv vəziyyətlərin simptomlarının azalmasına müsbət təsir göstərə bilər.

Editor.az xəbər verir ki, bu barədə 1 nömrəli Üzgüçülük Məktəbinin baş direktoru, olimpiya çempionu Anton Çupkovla birlikdə məktəbi təsis edən Yevgeni Petruхin bildirib.

Onun sözlərinə görə, üzgüçülüyün psixoloji vəziyyətə müsbət təsiri əsasən üç amillə bağlıdır: diqqətin xarici təsirlərdən yayındırılması, insanda nəzarət hissinin formalaşması və hərəkətlərin ritmik xarakter daşıması.

Ekspert qeyd edib ki, üzgüçülük zamanı su insanı bir sıra xarici qıcıqlandırıcılardan təcrid edir və diqqət nəfəsalma, qol hərəkətləri və bədənin vəziyyəti kimi proseslərə yönəlir. Bu isə insanın keçmiş və gələcəklə bağlı narahat düşüncələrdən uzaqlaşaraq diqqətini mövcud ana cəmləməsinə şərait yaradır.

Petruхinin sözlərinə görə, üzgüçülük həmçinin insanda prosesə nəzarət hissini gücləndirir. Suda nəfəs alma, hərəkətlərin ardıcıllığı və bədənin vəziyyətinə nəzarət etmək diqqəti konkret və aydın tapşırıqlara yönəldir. Bu, xüsusilə narahatlıq zamanı yaranan xaos və idarəolunmazlıq hissinin azalmasına kömək edə bilər.

Üzgüçülük zamanı təkrarlanan hərəkətlər və ritmik nəfəsalma da sinir sisteminə sakitləşdirici təsir göstərə bilər. Ekspert bildirib ki, ritmik fiziki aktivlik beynin sensor siqnalları emal edən strukturlarının fəaliyyətinə təsir göstərərək ümumi oyanıqlıq səviyyəsinin azalmasına şərait yaradır.

Bu fikirlər 2022-ci ildə “Journal of Affective Disorders” jurnalında dərc olunan sistematik icmalın nəticələri ilə də müəyyən qədər uyğunluq təşkil edir. Araşdırmaya əsasən, su ilə əlaqəli fiziki məşqlər narahatlıq və depressiv simptomların azalmasında effektiv fiziki aktivlik növlərindən biri ola bilər.

Petruхin əlavə edib ki, hətta bir üzgüçülük təlimindən sonra belə stress səviyyəsində nəzərəçarpacaq azalma müşahidə oluna bilər. Onun sözlərinə görə, bəzi hallarda bu göstərici 30 faizə qədər çata bilər.

Bununla belə, mütəxəssislər qeyd edirlər ki, üzgüçülük stress və narahatlığın azalmasına dəstək versə də, depressiyanın müalicəsində peşəkar tibbi və psixoloji yardımın alternativi hesab olunmamalıdır.

//Gülnarə Abasova, Editor.az