Enerji içkiləri ürək-damar sistemi ilə bağlı problemləri olan insanlar üçün ciddi təhlükə yarada bilər. Aritmiya, arterial hipertenziya, ürəyin işemik xəstəliyi və ürək çatışmazlığından əziyyət çəkən şəxslərə bu içkilərdən istifadə etmək tövsiyə edilmir.
Editor.az xəbər verir ki, mütəxəssislərin fikrincə, enerji içkilərinin tərkibindəki stimullaşdırıcı maddələr ürək-damar sisteminə ciddi təsir göstərərək ürək ritminin pozulması riskini artıra bilər. Xüsusilə idmançılar risk qrupunda hesab olunur. Belə şəxslərdə enerji içkilərinin istifadəsi həyati təhlükə yarada bilən ürək ritm pozuntularına, o cümlədən mədəcik taxikardiyasına səbəb ola bilər.
Enerji içkilərinin alkoqolla birlikdə qəbul edilməsi isə daha təhlükəli hesab olunur. Bu kombinasiya orqanizmdə elektrolit pozuntuları və ağır aritmiyalar riskini artırır.
Mütəxəssisin sözlərinə görə, təhlükənin əsas səbəblərindən biri enerji içkilərinin tərkibindəki quarana, taurin və kofeinin birgə təsiridir. Bu maddələr ürək əzələsində arzuolunmaz elektrik aktivliyinə səbəb ola, kofein isə digər komponentlərlə birlikdə ürək-damar sistemi üçün riski daha da yüksəldə bilər.
Enerji içkilərinin qəbulu qan təzyiqinin kəskin yüksəlməsinə, damarların fəaliyyətinin pozulmasına və elektrokardioqrammada QTc intervalının uzanmasına gətirib çıxara bilər. Xüsusilə uzun QT sindromu kimi nadir genetik pozuntuları olan insanlarda bu vəziyyət ciddi ürək ritm pozuntusu və hətta qəfil ürək ölümü ilə nəticələnə bilər.
Enerji içkisindən sonra ürəkdöyünmə, ürəyin fəaliyyətində fasilələr, başgicəllənmə, müvazinətin pozulması və döş qəfəsində ağırlıq hissi yaranarsa, dərhal tibbi yardım almaq tövsiyə olunur. Belə hallarda mümkün qədər tez elektrokardioqramma müayinəsindən keçmək vacibdir. Ürək ritminin qeydə alınması üçün bəzi hallarda ağıllı saatların müvafiq funksiyalarından da istifadə etmək mümkündür.
Mütəxəssislər enerji içkisi qəbul etdikdən sonra arterial təzyiqində kəskin yüksəlmə və ya ürək ritmində pozuntu müşahidə olunan şəxslərə bu içkilərdən tamamilə imtina etməyi tövsiyə edirlər.
//Gülnarə Abasova, Editor.az