Ortodont və qnatoloq Madina Xastsayeva bildirib ki, yuxuda diş qıcırdatmaq və ya qələm çeynəmək stresə verilən reaksiya ola bilər.
Editor.az xarici mediaya istinadən xəbər verir ki, mütəxəssisin sözlərinə görə, bruksizm əsasən yuxu zamanı çənələrin qeyri-iradi şəkildə sıxılması və dişlərin qıcırdadılması ilə xarakterizə olunur. Qələm çeynəməkdən fərqli olaraq, bruksizm orqanizmin stresə qarşı şüuraltı reaksiyası hesab olunur.
Həkim qeyd edib ki, bu halın əsas səbəblərindən biri psixoemosional gərginlikdir. İnsan narahatlıq keçirdikdə və ya duyğularını içində saxladıqda, bədən stressi azaltmaq üçün müxtəlif yollar axtarır. Bəzilərində bu, çiyin nahiyəsində gərginlik, digərlərində yuxusuzluq, başqa şəxslərdə isə çeynəmə əzələlərinin həddindən artıq gərilməsi şəklində özünü göstərir.
“Xroniki stress, sinir sisteminin həddən artıq yüklənməsi və yuxu pozuntuları, böyük şəhər həyatında bu amillər bruksizmin yaranması üçün əlverişli mühit formalaşdırır. İnsan yaxınları ona deməyincə belə bir problemi olduğunu hiss etməyə də bilər”, — deyə Xastsayeva vurğulayıb.
Onun sözlərinə görə, diş qıcırdatmaq ilkin mərhələdə zərərsiz görünsə də, zaman keçdikcə fəsadları nəzərə çarpmağa başlayır. Bunlara diş minasının aşınması, çatlar, diş həssaslığının artması, çənə ağrıları və səhər baş ağrıları daxildir.
“Vacib məqam odur ki, bu, sadəcə gecələr eşidilən xoşagəlməz səs deyil, orqanizmin həddindən artıq yükləndiyinin siqnalıdır”, — deyə qnatoloq xəbərdarlıq edib.
Mütəxəssis diş qıcırdatmasından şübhələnən şəxslərə ilk növbədə stomatoloqa müraciət etməyi tövsiyə edib. Onun sözlərinə görə, diş həkimi diş aşınması, mikroçatlar və əzələ gərginliyi kimi əlamətləri müəyyən edə bilər.
“Stomatoloq diaqnoz qoyacaq, dişləməni qiymətləndirəcək və lazım gələrsə, pasiyent üçün fərdi qoruyucu ağızlıq hazırlayacaq. Bu ağızlıq gecə istifadə olunur və dişlərə düşən təzyiqi azaldır. Lakin unutmaq olmaz ki, biz nəticələri müalicə edirik. Əgər əsas səbəb stressdirsə, psixoloq, yuxu mütəxəssisi və ya nevroloqun köməyinə ehtiyac yarana bilər”, — deyə ekspert əlavə edib.
//Gülnarə Abasova, Editor.az