Uşaqların qulaqcıqlardan uzun müddət və yüksək səslə istifadə etməsi eşitmə qabiliyyətinə mənfi təsir göstərə bilər.
Editor.az xəbər verir ki, bunu rusiyalı otorinolarinqoloq, “SM-Klinika”nın uşaq həkimi Aliguseyn Əliyev bildirib.
Mütəxəssisin sözlərinə görə, qulaqcıqdan gündəlik istifadə özlüyündə uşağın mütləq eşitmə qabiliyyətini itirəcəyi anlamına gəlmir. Əsas risk səsin yüksəkliyi və qulaqcıqdan istifadə müddəti ilə bağlıdır. Səs nə qədər yüksək olarsa, qulağın onu zərər görmədən qəbul edə biləcəyi müddət də bir o qədər qısa olur.
Həkim qeyd edib ki, yüksək səs daxili qulaqda yerləşən həssas hüceyrələrə zərər verə bilər. Bu proses tədricən baş verdiyindən uşaq problemi dərhal hiss etməyə bilər. Nəticədə eşitmə qabiliyyətinin davamlı zəifləməsi, qulaqda küy və ya cingilti, eləcə də adi səslərə qarşı həssaslığın artması müşahidə oluna bilər.
Əliyevin sözlərinə görə, Ümumdünya Səhiyyə Təşkilatı və Beynəlxalq Telekommunikasiya İttifaqının standartlarında uşaqlar üçün səs yükü ilə bağlı 75 desibel səviyyəsində həftədə 40 saata qədər göstərici nəzərdə tutulur. Lakin bu, uşağın həftə ərzində 40 saat qulaqcıqdan istifadə etməsinin tövsiyə edildiyi anlamına gəlmir. Səsin 85 desibelə yüksəldilməsi zamanı isə eyni səs yükünə təxminən dörd saat ərzində çatmaq mümkündür. Buna görə də 85 desibellə məhdudlaşdırılan qulaqcıqları belə uzunmüddətli gündəlik istifadə üçün tam təhlükəsiz hesab etmək olmaz.
Həkim həmçinin telefonun səs səviyyəsi göstəricisinə yalnız faizlə əsaslanmağın düzgün olmadığını bildirib. Çünki müxtəlif cihaz və qulaqcıqlarda eyni faiz göstəricisi fərqli səs səviyyəsinə uyğun gələ bilər.
Mütəxəssis valideynlərə uşaqlar üçün mümkün qədər aşağı səs səviyyəsindən istifadə etməyi və cihazlarda səs məhdudiyyəti funksiyasını aktivləşdirməyi tövsiyə edib.
Onun sözlərinə görə, uşaq qulaqcıqla bir neçə saat fasiləsiz musiqi dinləməməli və ya videoya baxmamalıdır. Ən azı hər saatdan bir fasilə verilməsi və bu müddətin sakit şəraitdə keçirilməsi məsləhətdir.
Həkim xüsusilə nəqliyyatda qulaqcıqdan istifadəyə diqqət çəkib. Belə hallarda ətrafdakı səs-küyü boğmaq üçün uşaqlar səs səviyyəsini artıra bilərlər. Ölçüsünə uyğun və səsboğucu xüsusiyyətə malik qulaqcıqlar isə bu ehtiyacı azaltmağa kömək edə bilər.
Əliyev valideynləri uşağın qulaqcıqdan istifadə etdikdən sonra qulaqda cingilti, tutulma və ya səslərin boğuq eşidilməsindən şikayət etməsi halında diqqətli olmağa çağırıb.
//Gülnarə Abasova, Editor.az