Əhval-ruhiyyəni yüksəltmək üçün şirniyyatlara üz tutmaq ən asan çıxış yolu kimi görünsə də, praktikada belə qidalar çox vaxt enerji vermək əvəzinə yenidən aclıq hissi yaradır və enerjinin kəskin şəkildə azalmasına səbəb olur.

Editor.az xəbər verir ki, bu barədə diyetoloq, qidalanma üzrə mütəxəssis və “Arıqlama Kodu” layihəsinin müəllifi Yuliya Kaşapova açıqlamasında bildirib.

Onun sözlərinə görə, daha sabit əhval-ruhiyyə üçün şirniyyat və şəkərli qəlyanaltılardan həddindən artıq istifadədən çəkinmək, əvəzində isə orqanizmdə şəkərin kəskin yüksəlməsi olmadan serotoninin sintezinə kömək edən qidalara üstünlük vermək lazımdır.

“Serotonin əhval-ruhiyyə, yuxu və iştahanın tənzimlənməsi ilə əlaqəlidir. Onun əsas prekursoru olan triptofan orqanizmdə sintez olunmadığı üçün qida vasitəsilə qəbul edilməlidir. Triptofanın əsas mənbələri balıq, ət, quş əti və süd məhsullarıdır”, – deyə mütəxəssis bildirib.

Lakin təkcə bir qida məhsulu əhvalı yaxşılaşdırmaq üçün kifayət etmir. Kaşapovanın sözlərinə görə, triptofan digər amin turşuları ilə rəqabət apardığı üçün yalnız protein qəbulu yetərli deyil. Buna görə də zülal mənbələrini kompleks karbohidratlarla birləşdirmək tövsiyə olunur.

Mütəxəssis qeyd edib ki, yorğunluğu şokoladla aradan qaldırmağa çalışmaq əvəzinə, balıq, ət və ya quş əti, tərəvəz və göyərtidən ibarət balanslı yemək seçilməlidir.

“Qidalanma rejiminə əməl etmək, yemək buraxmamaq, hər porsiyaya protein əlavə etmək, tərəvəz, meyvə və faydalı yağları unutmaq olmaz”, – deyə o vurğulayıb.

Kaşapovanın fikrincə, əhval-ruhiyyəni yaxşılaşdıran qidalar bahalı və ekzotik məhsullar deyil. Bunlara kəsmik, şəkərsiz və qatqısız təbii yoqurt, tərəvəz, meyvə, giləmeyvə, göyərti ilə birlikdə ölçülü şəkildə istehlak olunan balıq və ət daxildir.

O əlavə edib ki, bağırsaq sağlamlığı da psixoloji vəziyyətə ciddi təsir göstərir. Ultra emal olunmuş qidaların daha çox istehlakı depressiv əlamətlərin yaranma riskini artırır. Tam və qida dəyəri yüksək məhsullarla zəngin rasion isə daha sabit psixi vəziyyətlə əlaqələndirilir.

“Əsas məqam odur ki, qidadan onun verə bilməyəcəyi nəticələri gözləmək olmaz. Düzgün qidalanma gün ərzində əhvalı, enerji səviyyəsini və emosional tarazlığı dəstəkləyə bilər. Lakin insan uzun müddətdir özünü yaxşı hiss etmirsə, bu, müalicəni əvəz etmir. Depressiya iki həftədən çox davam edərsə, insan sevdiyi şeylərə marağını itirərsə, yuxu və iştah dəyişərsə, enerji azalarsa, mütləq həkimə müraciət etmək lazımdır”, – deyə o sözlərini yekunlaşdırıb.

//Gülnarə Abasova, Editor.az