Böyük Britaniyada cərrahlar dünyada ilk dəfə beyin şişinin çıxarılması əməliyyatı zamanı süni intellektdən birbaşa istifadə ediblər. Texnologiya mütəxəssislərə beynin həyati əhəmiyyət daşıyan strukturlarını müəyyənləşdirməyə və əməliyyat zamanı onların zədələnməsinin qarşısını almağa kömək edib.

Editor.az xəbər verir ki, bu barədə “The Independent” məlumat yayıb.

Əməliyyat 48 yaşlı Ris Hibbert üzərində Londondakı Milli Nevrologiya və Neyrocərrahiyyə Xəstəxanasında həyata keçirilib. Cərrahi müdaxilə zamanı süni intellekt sistemi beynin müxtəlif strukturlarını fərqli rənglərlə işarələyib. Bu, cərrahlara şişin çıxarılması üçün təhlükəsiz zonanın sərhədlərini daha dəqiq müəyyən etməyə imkan verib.

Mütəxəssislərin sözlərinə görə, belə texnologiya beyin əməliyyatları zamanı xüsusi əhəmiyyət daşıyır. Çünki şişin yaxınlığında həyati funksiyalara cavabdeh olan mühüm beyin strukturları yerləşə bilər. Bu strukturların cəmi bir neçə millimetr ölçüsündə zədələnməsi belə görmə qabiliyyətinin itirilməsi də daxil olmaqla ciddi fəsadlara səbəb ola bilər.

Əməliyyat zamanı istifadə olunan süni intellekt aləti London Universitet Kollecinin Houks İnstitutunun mütəxəssisləri tərəfindən hazırlanıb. Sistem yüzlərlə beyin əməliyyatının video görüntüləri əsasında təlimləndirilib.

Hibbertin sözlərinə görə, may ayında keçirilən əməliyyat onun görmə qabiliyyətinin qorunmasına kömək edib. Hazırda pasiyent artıq işinə qayıdıb.

Neyrocərrah Hani Markus bildirib ki, bu, süni intellektin cərrahiyyədə tətbiqi baxımından mühüm addımdır. Onun sözlərinə görə, britaniyalı mütəxəssislər hazırda mürəkkəb əməliyyatlar zamanı cərrahlara xəstənin orqanizmində daha dəqiq istiqamətlənməyə kömək edən digər süni intellekt sistemlərini də sınaqdan keçirirlər.

Beləliklə, süni intellekt tibbdə yalnız xəstəliklərin diaqnostikası və müalicənin planlaşdırılması mərhələsində deyil, artıq birbaşa cərrahi müdaxilə zamanı da həkimlərə kömək edən texnologiyaya çevrilir.

//Gülnarə Abasova, Editor.az