ABŞ-də məktəblərdə rəqəmsal cihazlardan geniş istifadə olunması valideynlərin narazılığına səbəb olub. Los-Ancelesdən Filadelfiyayadək müxtəlif şəhərlərdə ailələr şagirdlərin dərs zamanı planşet və noutbuk qarşısında keçirdikləri vaxtın azaldılmasını, bəzi hallarda isə ənənəvi tədris üsullarına daha çox üstünlük verilməsini tələb edirlər.

COVID-19 pandemiyası dövründə distant təhsilin yayılması ilə məktəblərdə rəqəmsal vasitələrin istifadəsi xeyli artıb. Lakin indi bir sıra valideynlər bu yanaşmanın uşaqların diqqətinə, məktəb nəticələrinə və sosial davranışlarına mümkün təsirlərindən narahatdırlar.

Valideynləri düşündürən məsələlər arasında diqqətin yayınması, internetdə kiberzorakılıq, yaşa uyğun olmayan materiallarla qarşılaşmaq və süni intellekt vasitəsilə tapşırıqları köçürmək kimi hallar var.

Dərs zamanı kompüter uşağın diqqətini yayındıra bilərmi?

Filadelfiyada yaşayan və özü də həkim olan valideynlərdən biri ikinci sinifdə oxuyan qızının məktəb kompüterində riyaziyyat tətbiqindən istifadə edərkən ətraf aləmdən təcrid olunmuş kimi göründüyünü danışıb.

Bu hadisə valideynin məktəblərdə texnologiyadan istifadəyə dair mövcud qaydaların yenidən nəzərdən keçirilməsi tələbinə qoşulmasına səbəb olub.

Los-Ancelesdə də oxşar narahatlıqları bölüşən ailələr “Schools Beyond Screens” — “Ekranlardan kənar məktəblər” adlı təşəbbüs ətrafında birləşiblər.

Hərəkatın yaradıcılarından Lila Byock bildirib ki, oğlu orta məktəbə başladıqdan və gün ərzində iPad-dən intensiv istifadə etdikdən sonra onun qiymətləri aşağı düşüb, özünəinamı isə zəifləyib.

Valideynlər bu cür nümunələrin məktəblərdə rəqəmsal cihazların hansı məqsədlə və nə qədər istifadə olunması barədə ciddi müzakirələrə ehtiyac yaratdığını düşünürlər.

Bəzi məktəblər ekran vaxtını məhdudlaşdırır

Valideynlərin narahatlığı fonunda ABŞ-nin bəzi məktəb dairələri rəqəmsal cihazlardan istifadəyə məhdudiyyətlər tətbiq etməyə başlayıb.

Pensilvaniya ştatındakı Lower Merion məktəb dairəsində qəbul edilən yeni qaydalara əsasən, şagirdlərin gündəlik ekran vaxtı oxuduqları sinif səviyyəsinə uyğun müəyyənləşdirilib.

Bununla belə, qərar bütün valideynləri qane etməyib. Bəzi ailələr övladlarının məktəb cihazlarından istifadədən tamamilə azad edilmək hüququnun məhdudlaşdırıldığını iddia edərək məhkəməyə müraciət ediblər. Məktəb rəhbərliyi isə irəli sürülən ittihamlarla razılaşmayıb.

Məktəblər texnologiyadan tamamilə imtina etməlidirmi?

Rəqəmsal cihazların istifadəsinə etiraz edən valideynlərin hamısı texnologiyanın məktəblərdən tam çıxarılmasını tələb etmir. Bir sıra ailələr hesab edir ki, düzgün tətbiq olunduqda rəqəmsal vasitələr tədrisin keyfiyyətini artıra bilər.

Süni intellekt də bu sahədə müəyyən imkanlar yaradır. O, şagirdlərin mövzuları hansı səviyyədə mənimsədiyini müəyyənləşdirmək, fərdi öyrənmə proqramları hazırlamaq və rəqəmsal savadlılığı inkişaf etdirmək üçün istifadə edilə bilər.

Beləliklə, müzakirələrin əsas mövzusu texnologiyanın məktəblərdə olub-olmaması deyil, ondan hansı həddə və necə istifadə edilməsidir. Valideynlər uşaqların sağlam öyrənmə mühitinin qorunmasını istəyir, rəqəmsal təhsilin tərəfdarları isə texnologiyanın verdiyi imkanların itirilməməsinin vacibliyini vurğulayırlar.

\\ Aydan Bünyatova, Editor.az