Audioloq Nikita Dikopoltsev bildirib ki, son illərdə bir çox şirkət əməkdaşlar arasında ünsiyyəti və fikir mübadiləsini asanlaşdırmaq məqsədilə açıq ofis konsepsiyasına üstünlük verir. Lakin bu yanaşma hər zaman gözlənilən nəticəni vermir və işçilərin məhsuldarlığına mənfi təsir göstərə bilər.  

Editor.az bu barədə xarici mediaya istinadla xəbər verir.

Mütəxəssisin sözlərinə görə, əsas problem kondisioner və ya ventilyasiya sistemlərinin yaratdığı fon səsi deyil, iş yoldaşlarının söhbətlərinin eşidilməsidir. İnsan beyninin eşitmə sistemi nitqi qəbul etməyə üstünlük verdiyindən, əməkdaşlar istəmədən ətrafdakı danışıqlara diqqət yetirirlər. Bu isə konsentrasiya tələb edən tapşırıqların icrasını çətinləşdirir.  

Yaponiyanın Yamaquçi Universiteti alimlərinin araşdırmasına istinad edən Dikopoltsev qeyd edib ki, fon səsində mənalı nitqin olması beyin fəaliyyətinin müəyyən sahələrində zəifləməyə səbəb olur. Təcrübə iştirakçılarında reaksiya sürətinin azalması və qısamüddətli yaddaşın zəifləməsi müşahidə edilib. Bu təsirlər insanların söhbətlərə birbaşa qoşulmamasına baxmayaraq ortaya çıxıb.  

Həkimin izahına görə, beyin avtomatik şəkildə eşitdiyi danışığın mənasını anlamağa və ya söhbətin özünə aid olub-olmadığını müəyyənləşdirməyə çalışır. Nəticədə iş prosesində vacib olan operativ yaddaşın bir hissəsi diqqətin yayındırılmasına sərf olunur.  

Mütəxəssis əlavə edib ki, akustik rahatlığın olmadığı açıq iş məkanlarında 5–6 saat işləyən şəxslərdə sensor yüklənməyə bənzər vəziyyət yarana bilər. Günün sonuna doğru məlumatları təhlil etmək və düzgün qərar vermək qabiliyyəti zəifləyir, yorğunluq hissi artır.  

Ekspert problemin təsirini azaltmaq üçün ofislərdə akustik zonalaşdırmanın tətbiqini, həmçinin səsboğucu qulaqlıqlardan istifadəni tövsiyə edib. Bununla belə, qulaqlıqlarda səs səviyyəsinin 70–75 desibeldən yüksək olmaması və fasiləsiz istifadənin iki saatı keçməməsi vacib hesab olunur.  

//Gülnarə Abasova, Editor.az