Ermənistanda keçirilən son parlament seçkilərindən dərhal sonra ölkənin pasport sistemi və seçki prosesinin şəffaflığı ilə bağlı illərdir yığılıb qalan qalmaqallar yenidən alovlanaraq daxili ictimai-siyasi müzakirələrin mərkəzinə çevrilib. Ölkənin müxalif mövqeli nüfuzlu media orqanlarından olan “Qolos Armenii” nəşrinin yaydığı məlumatlara görə, Ermənistan vətəndaşlarının pasportlarının bir vaxtlar Türkiyədə çap olunması ilə bağlı ortaya atılan və vaxtilə cinayət təqibi mövzusuna çevrilən iddialar sosial şəbəkələrdə yenidən ciddi müzakirə dalğası yaradıb. Rəsmi qurumların bu həssas mövzunu səssizcə qapatmaq cəhdləri cəmiyyətdəki şübhələri daha da artırarkən, “Joxovurd” qəzetinin Rusiyanın “Pervıy Peçatnıy Dvor” şirkətindən tender keçirilmədən alınan və dövlət gerbinin rənglərində ciddi qanun pozuntularına yol verilmiş 700 min ədəd standartdan kənar pasport blankı barədə ifşaedici materialları böhrana yeni çalarlar əlavə edib. Müxalifətin həm 2021-ci, həm də 2026-cı il seçkilərində yüz minlərlə səs fərqi ilə manipulyasiya edildiyini, xüsusən də “Hayastan” blokuna məxsus səslərin gizlədilərək hakim “Vətəndaş Müqaviləsi” Partiyasının lehinə yazıldığını iddia etməsi biometrik sənədlərin tətbiqinin növbəti dəfə təxirə salınması ilə birləşdikdə Nikol Paşinyan hökumətinin dövlət idarəçiliyindəki dərin böhranını növbəti dəfə üzə çıxarıb.
Məsələ ilə bağlı NOCOMMENT.az-a danışan siyasi şərhçi Əli Əkbəroğlu qeyd edib ki, Ermənistanda pasport istehsalı və paylanması sahəsindəki dərəbəylik həm daxili təhlükəsizlik, həm də seçki sisteminin legitimliyi üçün çox ciddi fəsadlar vəd edir:
“İrəvanın dövlət sənədlərinin çapı kimi milli təhlükəsizlik baxımından strateji əhəmiyyət daşıyan bir sahəni qeyri-şəffaf sövdələşmələrə qurban verməsi, üstəlik, gerbdəki dövlət rəmzlərinin tələb olunan qızılı deyil, ağ rəngdə çap edilməsi ölkədə idarəetmə institutlarının tamamilə deqradasiyaya uğradığını göstərir. Hökumətin biometrik pasport sisteminə keçidi illərdir süni şəkildə yubatması heç də texniki problemlərlə bağlı deyil; bu, seçki saxtakarlıqlarını, ‘ölü canlar’ və təkrar səsvermə mexanizmlərini qoruyub saxlamaq üçün bilərəkdən atılan addımdır. Paşinyan iqtidarının bu dərəbəyliyə göz yumması və rəsmi araşdırmalar açmaqdan qaçması cəmiyyətdəki böyük etimadsızlıq uçurumunu daha da genişləndirir və növbəti daxili siyasi partlayışın əsasını qoyur”.
Onun sözlərinə görə, Ermənistanda seçki nəticələrinin şübhə altına alınması və sənəd dövriyyəsindəki qaranlıq məqamlar ölkə rəhbərliyinin hakimiyyəti hər nə yolla olursa-olsun əldə saxlamaq cəhdinin birbaşa təzahürüdür: “Tender keçirilmədən keyfiyyətsiz pasport blanklarının alınması və Türkiyə ilə bağlı iddiaların üzərinin örtülməsi Nikol Paşinyan komandasının korrupsiya bataqlığında boğulduğunun növbəti sübutudur. Əgər bir ölkədə biometrik sənədlərin tətbiqi üçün tender prosesi 2017-ci ildən bəri qəsdən dondurulursa və xarici tərəfdaşlarla müqavilələr yenilənmirsə, deməli, dövlət səviyyəsində sistemli bir qanunsuzluq himayə edilir. İctimaiyyətdən gizlədilən bu məqamlar və seçkilərdə müxalifətin yüz minlərlə səsinin buxarlanması iddiaları Ermənistanda hüquqi dövlət anlayışının tamamilə sıradan çıxdığını, ölkənin isə diktator meyilləri olan bir hakimiyyət tərəfindən şəxsi maraqlar çərçivəsində idarə olunduğunu beynəlxalq birliyə də nümayiş etdirir”.