Ukrayna Baş nazirinin müavini və rəqəmsal transformasiya naziri Mixail Fedorov bildirib ki, Ukrayna pilotsuz uçuş aparatlarından istifadə etməklə Krımı Rusiyanın əsas ərazisindən təcrid etmək istiqamətində fəaliyyətini davam etdirir.

Fedorovun sözlərinə görə, Ukrayna qüvvələrinin əsas məqsədi yarımadanın logistik təminatını pozmaq və Rusiya ordusunun təchizat marşrutlarını kəsməkdir. O qeyd edib ki, dron texnologiyalarının inkişafı bu vəzifələrin yerinə yetirilməsində mühüm rol oynayır.
Nazir vurğulayıb ki, həyata keçirilən əməliyyatlar nəticəsində Krımın nəqliyyat və təchizat əlaqələri ciddi şəkildə məhdudlaşdırıla bilər. Onun fikrincə, bu proses davam edərsə, yarımada faktiki olaraq “adaya çevrilə” və Rusiyadan təcrid oluna bilər.

Fedorov bu açıqlamaları PRESSING YouTube kanalına müsahibəsində səsləndirib. O əlavə edib ki, Ukrayna müdafiə sənayesi dron istehsalını genişləndirir və müasir pilotsuz sistemlərin tətbiqini artırır.

Ekspertlərin fikrincə, Krımın logistikasına zərbələr yarımadanın hərbi təminatı üçün strateji əhəmiyyət daşıyan nəqliyyat marşrutlarına təzyiqi gücləndirə bilər.

//Samir Qurbanov, Editor.az