Dietoloq və terapevt Svetlana Jernovanın sözlərinə görə, səhər yeməyi oyandıqdan sonra ilk bir saat ərzində qəbul edilməlidir. Mütəxəssis bildirib ki, qidalanma saatları insanın enerji səviyyəsinə, həzm sisteminin fəaliyyətinə və ümumi sağlamlığına birbaşa təsir göstərir.  

Editor.az bu barədə xarici mediaya istinadla yazıb.

Həkim qeyd edib ki, orqanizm müntəzəm qidalanma rejiminə uyğunlaşır. İnsan hər gün təxminən eyni saatlarda qidalandıqda, həzm sistemi əvvəlcədən “hazırlaşır”, fermentlərin ifrazı artır və qidaların mənimsənilməsi yaxşılaşır. Xaotik qəlyanaltılar isə köp, ağırlıq hissi və enerji dalğalanmalarına səbəb ola bilər.  

Jernova bildirib ki, ən geniş yayılmış səhvlərdən biri səhər yeməyini buraxmaq və gec saatlarda ağır şam yeməyi yeməkdir. Bu zaman gün ərzində qanda şəkər səviyyəsində kəskin dəyişikliklər baş verir, əsəbilik artır və axşam saatlarında həddindən artıq yemək riski yüksəlir.  

Mütəxəssisin sözlərinə görə, səhər yeməyi üçün universal ideal saat olmasa da, ən optimal variant oyandıqdan sonra ilk bir saat ərzində qidalanmaqdır. Əks halda aclıq hormonlarının səviyyəsi artır və insanın iştahasını nəzarətdə saxlaması çətinləşir. Bundan əlavə, səhər yeməyini davamlı olaraq keçmək insulinə həssaslığın azalmasına səbəb ola bilər.  

Həkim vurğulayıb ki, maddələr mübadiləsi baxımından günün əsas qida qəbulu çox vaxt nahar hesab olunur. Günorta saatlarında orqanizm zülal, yağ və karbohidratları daha effektiv emal edir, həmçinin qlükozanı enerji mənbəyi kimi daha yaxşı istifadə edir.  

Jernova “axşam saat altıdan sonra yemək olmaz” qaydasının artıq köhnəlmiş yanaşma olduğunu deyib. Onun sözlərinə görə, əsas məsələ yatmazdan dərhal əvvəl ağır yeməklərdən qaçmaqdır. Optimal variant şam yeməyini yatmazdan 3–4 saat əvvəl qəbul etməkdir. Gec və ağır yeməklər yuxu keyfiyyətini aşağı salır, reflüks və çəki artımı riskini yüksəldir.  

//Gülnarə Abasova, Editor.az