Çin alimlərinin araşdırmasına görə, müxtəlif və balanslaşdırılmış qidalanma 65 yaşdan yuxarı insanlarda mədə xorası riskinin azalması ilə əlaqəli ola bilər. Tədqiqatın nəticələri göstərib ki, qida rasionunun müxtəlifliyi xəstəliyin yaranma ehtimalının 24 faizədək aşağı olması ilə əlaqələndirilir.
Çançji Tibb Kollecinin alimləri tərəfindən aparılan araşdırmanın nəticələri Frontiers in Nutrition elmi jurnalında dərc olunub. Tədqiqat çərçivəsində 2008–2018-ci illər ərzində 13 274 nəfərin sağlamlıq və qidalanma məlumatları təhlil edilib. Müşahidələrin başlanğıcında iştirakçıların heç birində mədə xorası qeydə alınmayıb.
Alimlər qidalanmanın müxtəlifliyini meyvə, tərəvəz, ət, balıq, yumurta, paxlalılar, çərəzlər, süd məhsulları və çay olmaqla doqquz məhsul qrupu əsasında qiymətləndiriblər. Təhlillər göstərib ki, qida rasionunda məhsul müxtəlifliyi artdıqca mədə xorası riskinin azalması ilə əlaqə müşahidə olunur. Müxtəlif qidalanma göstəricisində hər əlavə bal xəstəliyin yaranma riskinin təxminən 5,6 faiz azalması ilə əlaqələndirilib.
Tədqiqatçılar yaş, həyat tərzi və ümumi sağlamlıq vəziyyəti kimi amilləri də nəzərə alıblar. Bununla belə, qidalanmanın müxtəlifliyi ilə mədə xorası riski arasındakı əlaqə bütün müşahidə dövründə eyni səviyyədə olmayıb. Ən nəzərəçarpan nəticələr tədqiqatın ilk illərində qeydə alınıb, sonrakı mərhələlərdə isə bu əlaqə statistik baxımdan təsdiqlənməyib.
Alimlər bildirirlər ki, bu nəticə sağlam qidalanmanın müəyyən müddətdən sonra qoruyucu təsirini itirdiyini göstərmir. Sadəcə, əldə olunan məlumatlar uzunmüddətli əlaqə barədə qəti nəticəyə gəlmək üçün kifayət etməyib.
Tədqiqat qidalanmanın müxtəlifliyi ilə mədə xorası riskinin azalması arasında əlaqə olduğunu göstərsə də, səbəb-nəticə əlaqəsini sübut etmir. Mədə xorası müxtəlif amillərlə bağlı yarana bildiyindən, balanslaşdırılmış qidalanma xəstəliyin qarşısının alınmasına zəmanət vermir.
Mütəxəssislər sağlamlığın qorunması üçün müxtəlif və balanslaşdırılmış qidalanmanın əhəmiyyətini vurğulasalar da, araşdırmanın nəticələrinin ehtiyatla şərh edilməsinin vacibliyini qeyd edirlər.
//Gülnarə Abasova, Editor.az