Türkiyənin Kütahya bölgəsində aparılan arxeoloji qazıntılar zamanı təxminən 4 min il əvvələ aid maraqlı tapıntı üzə çıxıb. Tavşanlı Höyük ərazisində Tunc dövründən qalan kərpicin üzərində it pəncələrinin izləri aşkarlanıb. Minilliklər boyu qorunub saxlanılan bu izlər qədim insanların gündəlik həyatına dair maraqlı məlumat verir.
Editor.az Euronews-a istinadən xəbər verir ki, Türkiyənin mədəniyyət və turizm naziri Mehmet Nuri Ersoy tapıntı barədə sosial şəbəkə hesabında məlumat paylaşıb.
Nazirin sözlərinə görə, izlər hələ qurumamış kərpicin üzərində yaranıb. Həmin kərpic sonradan Tunc dövründə inşa edilmiş bir tikilinin divarında istifadə olunub. Binanın yanğın nəticəsində dağılmasından sonra kərpic dağıntılar arasında qalıb və üzərindəki izlər bu günədək qorunub.
Adi bir an tarixə çevrilib
Qədim dövrdə tikinti materialı hazırlamaq üçün torpaq, su və saman qarışdırılaraq qəliblərə tökülür, daha sonra günəş altında qurudulurdu. Ehtimal olunur ki, bir it quruma prosesi başa çatmamış kərpicin üzərindən keçib və pəncə izlərini orada qoyub.
Kərpic quruduqdan sonra həmin izlər səthdə sabitləşib. Materialın tikintidə istifadə olunması və daha sonra dağıntılar altında qalması isə bu kiçik detalın min illər ərzində itməməsinə səbəb olub.
Tapıntı təkcə qədim tikinti üsulları barədə məlumat vermir. O, təxminən 4 min il əvvəl həmin ərazidə insanların və heyvanların gündəlik həyatından təsadüfən qorunub qalmış bir anı da əks etdirir.
Qədim yaşayış məskənində qazıntılar davam edir
Qərbi Anadolunun Tunc dövrünə aid böyük şəhər məskənlərindən biri hesab olunan Tavşanlı Höyükdə arxeoloji tədqiqatlar 2021-ci ildən professor Erkan Fidanın rəhbərliyi ilə aparılır.
Qazıntılar zamanı qədim yaşayış yerinin tikililəri və müxtəlif arxeoloji materialları ilə yanaşı, həmin dövrdə yaşayan insanların gündəlik həyatına işıq salan izlər də üzə çıxarılır.
Mehmet Nuri Ersoy araşdırmaları aparan professor Erkan Fidana və onun komandasına təşəkkür edib. Nazir bildirib ki, bu qazıntılar sayəsində yalnız qədim tikililər və əşyalar deyil, keçmişdən xəbər verən belə gözlənilməz detallar da aşkarlanır.
\\ Aydan Bünyatova, Editor.az