Rusiya xarici işlər nazirinin müavini Sergey Ryabkov bildirib ki, Moskva ABŞ və İran arasında mümkün razılaşmanın əldə olunmasına yardım göstərməyə hazırdır.

Editor.az bu barədə xarici mediaya istinadla xəbər verir.

Onun sözlərinə görə, Rusiya tərəflər arasında fikir ayrılıqlarının aradan qaldırılması və gərginliyin azaldılması istiqamətində konstruktiv rol oynamağa davam edir.  

Ryabkov vurğulayıb ki, Rusiya daha əvvəl də İranın yüksək səviyyədə zənginləşdirilmiş uran ehtiyatlarının Rusiya ərazisinə daşınması ilə bağlı təklif irəli sürüb və bu təşəbbüs hələ də qüvvədə qalır. O qeyd edib ki, söhbət tərəflərin razılığı əsasında həyata keçirilə biləcək mərhələli mexanizmdən gedir və Moskva heç bir tərəfə öz təklifini diktə etmir.  

Rusiya rəsmisinin sözlərinə görə, belə bir mexanizm İranın nüvə proqramı ilə bağlı narahatlıqların aradan qaldırılmasına və diplomatik həll yolunun tapılmasına xidmət edə bilər. O əlavə edib ki, yekun məqsəd nüvə materiallarının dinc məqsədlərlə, o cümlədən İranın enerji reaktorları üçün yanacaq istehsalında istifadə edilməsidir.  

Kremlin dəfələrlə bəyan edib ki, Moskva İran ətrafında gərginliyin azaldılmasına yönəlmiş bütün xoşməramlı təşəbbüsləri dəstəkləyir. Rusiya rəhbərliyi hesab edir ki, diplomatik dialoq regionda sabitliyin qorunması və daha genişmiqyaslı qarşıdurmanın qarşısının alınması üçün yeganə effektiv vasitədir.  

Qeyd edək ki, son həftələr ABŞ və İran arasında münaqişənin dayandırılması və nüvə proqramı ətrafında kompromis əldə olunması istiqamətində danışıqların intensivləşdiyi bildirilir. Ekspertlər hesab edirlər ki, mümkün razılaşmanın dayanıqlılığı tərəflərin öhdəliklərə əməl etməsindən və beynəlxalq vasitəçilərin rolundan asılı olacaq. 

//Gülnarə Abasova, Editor.az