Microsoft Windows 11 əməliyyat sistemi ilə çalışan və zamanla yavaşlayan kompüterlərin performansını yaxşılaşdırmaq üçün sadə üsulu xatırladıb.

Şirkətin məlumatına görə, kompüterin zəifləməsi hər zaman avadanlığın dəyişdirilməsini və ya əməliyyat sisteminin yenidən qurulmasını tələb etmir. Problemin səbəblərindən biri Windows işə salındıqda avtomatik açılan çoxsaylı proqramlar ola bilər.
Bu proqramlar sistemin yüklənməsini ləngidir və kompüter işləyərkən prosessor və operativ yaddaş kimi resurslardan istifadə edə bilər.

İstifadəçilər lazımsız proqramların avtomatik işə düşməsini Task Manager vasitəsilə deaktiv edə bilərlər. Bunun üçün Ctrl + Shift + Esc düymələrini sıxmaq, daha sonra Startup apps bölməsinə daxil olmaq və ehtiyac olmayan proqramları Disable etmək kifayətdir.

Eyni əməliyyatı Settings → Apps → Startup bölməsindən də həyata keçirmək mümkündür.
Microsoft bununla yanaşı, kompüterin yavaşlamasına diskdə boş yerin azalması, çoxsaylı arxa plan proqramları, köhnəlmiş proqram təminatı və cihazın texniki imkanlarının məhdud olması kimi amillərin də səbəb ola biləcəyini bildirir.
Mütəxəssislər isə istifadəçiyə tanış olmayan sistem və sürücü proqramlarını deaktiv etməməyi tövsiyə edir. Əsasən avtomatik başlamasına ehtiyac olmayan üçüncü tərəf tətbiqlərinin söndürülməsi kompüterin açılışını sürətləndirə bilər.

//Samir Qurbanov, Editor.az