ABŞ-da Rusiyanın 2028-ci ildə Avropaya qarşı mümkün hərbi əməliyyata başlaması ilə bağlı xüsusi simulyasiya keçirilib.

Ssenaridə Moskvanın Moldovaya hücum etməklə Avropadakı parçalanmadan istifadə etməyə çalışdığı, daha sonra isə münaqişənin NATO ərazisinə yayılmasının mümkün olduğu ehtimal edilib.

Editor.az xəbər verir ki, UNİAN-ın “The Washington Post”a istinadən yaydığı məlumata görə, simulyasiyada ABŞ Konqresinin üzvləri, keçmiş hərbçilər, diplomatlar və kəşfiyyat nümayəndələri iştirak edib. Ssenariyə əsasən, həmin vaxt Ukraynadakı müharibə hələ də davam edir və Rusiya münaqişədən istifadə edərək Avropada əlavə gərginlik yaratmağa çalışır.

Ssenari necə inkişaf edir?
Simulyasiyanın ən təhlükəli mərhələsində Rusiyanın Moldovaya qarşı hərbi əməliyyata başladığı təsəvvür edilib. Ardınca Rusiyaya məxsus pilotsuz uçuş aparatlarından birinin NATO üzvü olan Rumıniyada yanacaq anbarına zərbə endirməsi və nəticədə insanların həlak olması ssenaridə əsas dönüş nöqtəsi kimi göstərilib.
Belə bir hadisənin NATO-nun kollektiv müdafiə mexanizmini, xüsusilə də Alyansın 5-ci maddəsinin tətbiqini gündəmə gətirəcəyi qeyd olunub.
Lakin simulyasiyada ABŞ-ın reaksiyası ilə bağlı ciddi narahatlıq ifadə edilib.

“The Washington Post”un analitiki Devid İqnatiusun yazdığına görə, ssenaridə iştirak edən bəzi Konqres üzvləri Amerika cəmiyyətinin Rusiya ilə birbaşa qarşıdurmaya səbəb ola biləcək sərt addımları dəstəkləməyəcəyini düşünürlər.

NATO-nun gələcəyi ilə bağlı narahatlıq
İqnatius hesab edir ki, ABŞ-ın Avropada liderlik rolunun zəifləməsi NATO daxilində parçalanma riskini artıra bilər. Onun fikrincə, Vaşinqtonun qətiyyətli mövqe nümayiş etdirməməsi Avropa ölkələrini daha müdafiəsiz vəziyyətə sala bilər.
Analitik Rusiyanın Ukraynaya qarşı müharibə çərçivəsində tətbiq etdiyi taktikanın Avropanın digər ölkələrinə də yayılmasının mümkünlüyünə diqqət çəkib. Onun fikrincə, Rusiya tərəfindən həyata keçirilən hibrid fəaliyyətlər artıq Avropada daha təhlükəli mərhələyə keçə bilər.
Ukrayna müharibəsi əsas amil olaraq qalır
Simulyasiyanın əsas fərziyyələrindən biri 2028-ci ildə Rusiya-Ukrayna müharibəsinin hələ də davam etməsidir. Belə vəziyyətdə Moskvanın Avropadakı siyasi fikir ayrılıqlarından istifadə edərək yeni cəbhə açmağa çalışa biləcəyi ehtimal edilib.

UNİAN yazır ki, bu ssenari real hadisənin proqnozu deyil. Bu, ABŞ və Avropanın mümkün böhran zamanı siyasi və hərbi reaksiyasını qiymətləndirmək üçün hazırlanmış simulyasiyadır. Buna baxmayaraq, müzakirə olunan ssenari NATO ölkələri arasında kollektiv müdafiə və ABŞ-ın Avropadakı rolunun gələcəyi ilə bağlı narahatlıqları əks etdirir.

//Samir Qurbanov, Editor.az