Müasir dövrdə geniş yayılmış bəzi “adlı” pəhrizlər həm effektivliyini itirib, həm də bəzi hallarda sağlamlıq üçün təhlükə yarada bilər.

Editor.az xəbər verir ki, bu barədə dietoloq Yelena Ustinova məlumat verib.

Onun sözlərinə görə, qan qrupuna görə pəhriz, Yapon pəhrizi, Kim Protasov pəhrizi və digər oxşar qidalanma sistemlərinin elmi əsasları kifayət qədər deyil və onlar artıq aktual hesab olunmur.

Mütəxəssis bildirib ki, arıqlamaq üçün əsas şərt hər hansı dəbli pəhrizə əməl etmək deyil, gündəlik qəbul edilən kalorinin sərf olunan enerjidən az olması, eyni zamanda rasionda kifayət qədər zülalın, sağlam yağların və balanslaşdırılmış karbohidratların yer almasıdır.

Dietoloq vurğulayıb ki, hər kəs üçün uyğun olan universal pəhriz mövcud deyil. Ən effektiv qidalanma proqramı insanın həyat tərzinə, sağlamlıq vəziyyətinə, qida vərdişlərinə və uzun müddət davam etdirə biləcəyi rejimə uyğun tərtib edilən fərdi rasiondur.

Ustinovanın sözlərinə görə, populyar pəhrizlərin əsas çatışmazlığı onların balanssız olmasıdır. Belə qidalanma sistemləri adətən çox aşağı kalorili olur, kifayət qədər zülal ehtiva etmir və uzunmüddətli istifadə üçün uyğun sayılmır. Nəticədə insan ya pəhrizi yarımçıq saxlayır, ya da piylə yanaşı əzələ kütləsini də itirir.

Mütəxəssis əlavə edib ki, müasir texnologiyalar, o cümlədən süni intellekt vasitəsilə insanın kalori ehtiyacına, qida tərkibinə və fərdi seçimlərinə uyğun balanslaşdırılmış qidalanma planı hazırlamaq mümkündür. Onun fikrincə, sağlam çəkiyə nail olmağın ən doğru yolu dəbli pəhrizlər deyil, uzunmüddətli və balanslı qidalanma vərdişlərinin formalaşdırılmasıdır.

//Gülnarə Abasova, Editor.az