Qazlı suyun hər gün qəbul edilməsinin sağlamlıq üçün zərərli olduğu ilə bağlı fikirlər geniş yayılsa da, mütəxəssislər şəkər və dadlandırıcı əlavə edilməmiş adi qazlı suyun əksər sağlam insanlar üçün təhlükəli olmadığını bildirirlər.

Editor.az xəbər verir ki, hematoloq Marqarita Araşanyanın sözlərinə görə, suyun tərkibində karbon qazının olması onu avtomatik olaraq zərərli içkiyə çevirmir. Bu səbəbdən yalnız qazlı olduğu üçün adi içməli sudan imtina etməyə ehtiyac yoxdur.

Bununla belə, qazlı suyun orqanizmə təsiri fərdi xüsusiyyətlərdən asılı ola bilər. Xüsusilə içkinin sürətlə və ya çox miqdarda qəbul edilməsi qarında köp, gəyirmə və mədədə dolğunluq hissini artıra bilər.

Mütəxəssis qeyd edib ki, qastroezofageal reflüksə meyilli insanlarda qazlı su narahatlığı daha da gücləndirə bilər. Buna səbəb qazın mədənin həcmini artırması və gəyirməyə səbəb olmasıdır.

Həkim həmçinin adi qazlı su ilə mineral su arasında fərq qoymağın vacibliyini vurğulayıb. Mineral suların tərkibində müxtəlif duzlar və minerallar olur və onların konsentrasiyası yüksək ola bilər. Bu səbəbdən müalicəvi və müalicəvi-süfrə mineral sularının uzun müddət həkim məsləhəti olmadan müntəzəm qəbul edilməsi tövsiyə edilmir.

Gündəlik istifadə üçün uyğun minerallaşma səviyyəsinə malik adi içməli suya üstünlük verilməsi məsləhət görülür.

Qazlı suyun diş minasına təsiri ilə bağlı məsələyə də aydınlıq gətirilib. Karbon qazı su ilə reaksiyaya girərək zəif karbon turşusu əmələ gətirir. Bu səbəbdən qazlı su qazsız sudan bir qədər daha turş olur. Lakin şəkərsiz adi qazlı sudakı bu təsir şəkər və əlavə turşular ehtiva edən şirin qazlı içkilərlə müqayisədə xeyli zəifdir.

Bu baxımdan şəkərsiz adi qazlı suyun diş minasına ciddi təhlükə yaratdığını söyləmək düzgün deyil. Bununla belə, məhsulun tərkibinə diqqət yetirmək vacibdir. Əgər içkinin tərkibində şəkər, sirop, turşular və digər əlavələr varsa, bu zaman dişlər, bədən çəkisi və maddələr mübadiləsi ilə bağlı risklər arta bilər.

Mütəxəssisin sözlərinə görə, şəkərsiz adi qazlı suyun müntəzəm qəbulu əksər sağlam insanlar üçün zərərli vərdiş hesab edilmir. Lakin qazlı su qəbulundan sonra güclü köp, reflüks və ya digər narahatlıqlar mütəmadi şəkildə yaranırsa, onun qəbulunu məhdudlaşdırmaq məqsədəuyğundur.

Belə hallarda insanın fərdi reaksiyasını nəzərə almaq və zərurət yarandıqda həkimlə məsləhətləşmək tövsiyə olunur.

//Gülnarə Abasova, Editor.az