Argentina millisinin və “İnter Mayami” klubunun hücumçusu Lionel Messinin peşəkar futbolçu karyerasını 2026-cı ilin sonunda başa vurmağı düşündüyü iddia olunur.

Editor.az “Footy Headlines” nəşrinin məlumatına istinadla xəbər verir ki, 39 yaşlı futbolçu cari ilin başa çatmasından sonra karyerasını bitirmək variantını nəzərdən keçirir. Bununla belə, Messinin bu barədə yekun qərar verdiyi və karyerasını başa vuracağı rəsmi şəkildə təsdiqlənməyib.

Messi sentyabrın 28-də MLS çempionatında “Kolumbus Kryu”ya qarşı keçirilən oyunda komandasının heyətində qola imza atıb.

Argentina millisinin heyətində isə futbolçunun oktyabrın 6-dan 7-nə keçən gecə Benin yığmasına qarşı vida matçında meydana çıxacağı gözlənilir.

Messi 2026-cı ildə keçirilən dünya çempionatında Argentina millisinin heyətində səkkiz qol vurub və turnirin bombardirlər siyahısında ikinci yeri tutub. Ondan yalnız Fransa millisinin hücumçusu Kilian Mbappe öndə olub — fransalı futbolçu mundialda 10 qola imza atıb.

Argentina finalda İspaniyaya 0:1 hesabı ilə məğlub olaraq dünya çempionu titulunu qoruya bilməyib. Görüşün əsas vaxtı qolsuz heç-heçə ilə başa çatıb, əlavə vaxtın ikinci hissəsində isə “Barselona”nın hücumçusu Ferran Torres İspaniyaya qələbə qazandıran qolu vurub.

Messi “İnter Mayami”yə keçməzdən əvvəl Fransanın PSJ və İspaniyanın “Barselona” klublarında çıxış edib. Kataloniya təmsilçisinin heyətində o, dörd dəfə UEFA Çempionlar Liqasının qalibi olub, həmçinin üç dəfə UEFA Superkubokunu və Klublararası Dünya Kubokunu qazanıb.

//Gülnarə Abasova, Editor.az