Səhərlər acqarına içilən cəmi bir fincan qəhvə bəzi insanlarda mədəaltı vəzin fəaliyyətinə mənfi təsir göstərə və zamanla ciddi sağlamlıq problemlərinin yaranmasına səbəb ola bilər.

Editor.az xəbər verir ki, bu barədə qastroenteroloq və dietoloq Marina Studenikina açıqlama verib.  

Həkimin sözlərinə görə, risk hər kəs üçün eyni deyil və əsasən mədəaltı vəzin vəziyyətindən, insanın həyat tərzindən, alkoqol və şəkər istehlakından asılıdır. Onun fikrincə, hətta şəkərsiz və siropsuz qəhvə belə müəyyən hallarda orqanizm üçün arzuolunmaz reaksiyalar yarada bilər.  

Mütəxəssis bildirir ki, acqarına qəhvə içilməsi öd ifrazını stimullaşdırır. Xolesistit, öd daşı xəstəliyi və ya öd yolları ilə bağlı problemləri olan insanlarda bu proses mədəaltı vəz şirəsinin geri axınına səbəb ola bilər. Nəticədə həzm fermentləri bağırsağa deyil, mədəaltı vəzin axacaqlarına qayıdır və uzun müddətdə iltihabın, eləcə də xroniki pankreatitin inkişaf riskini artırır.  

Xroniki pankreatit zamanı fermentlərin istehsalı pozulur ki, bu da köp, qarın ağrısı, ishal və ya qəbizlik, həmçinin çəki itkisi kimi problemlərlə müşayiət oluna bilər. Həkim əlavə edib ki, xəstəliyin ağırlaşmaları arasında insulinlə əlaqəli şəkərli diabetin inkişafı da mümkündür.  

Marina Studenikina praktikadan bir nümunə də gətirib. Onun sözlərinə görə, arıqlamaqda çətinlik çəkən bir pasiyent səhər yeməyindən bir neçə saat sonra qara qəhvə içdikdə qanda qlükoza səviyyəsində kəskin yüksəliş müşahidə olunurdu. Qəhvə rasiondan çıxarılıb onun əvəzinə kasnı içkisi istifadə edildikdən sonra isə bu dalğalanmalar aradan qalxıb.  

Qeyd etmək lazımdır ki, bu açıqlamalar konkret bir həkimin peşəkar qiymətləndirməsidir və bütün insanlar üçün universal tibbi nəticə hesab olunmur. Fərdi sağlamlıq vəziyyəti və qidalanma xüsusiyyətləri nəzərə alınaraq həkim məsləhəti almaq tövsiyə edilir.

//Gülnarə Abasova, Editor.az