Çində qeyri-adi görünüşünə görə sosial şəbəkələrdə “dünyanın ən çirkin iti” adlandırılan Huahua adlı border-kolli internetin yeni ulduzuna çevrilib.

Editor.az xəbər verir ki, Çin mediasının yaydığı məlumata görə, Huahuanın iştirakı ilə çəkilən qısa videolar cəmi bir həftə ərzində müxtəlif sosial media və qısa video platformalarında sürətlə yayılıb və milyonlarla baxış toplayıb. İstifadəçilər iti qeyri-adi görünüşünə görə “çirkin cazibəsi” ilə fərqlənən heyvan kimi qiymətləndirir, hətta onu zarafatla “gözəllik baxımından sonuncu yeri tutan it” adlandırırlar.

Yerli medianın məlumatına əsasən, Huahuanın hər iki valideyni sərgi görünüşünə malik, safqan border-kollilərdir. Balaların qalan hissəsi isə cinsin standart görünüşünə uyğun doğulub. Huahuanın fərqli görünüşünün səbəbi nadir genetik mutasiya ilə əlaqələndirilir. Onun tükləri həddindən artıq sıx və dağınıqdır, qulaqlarının üzərindəki çıxıntılı tük dəstələri isə iki kiçik “quyruğu” xatırladır.

Qeyri-adi görünüşünə görə Huahuanı uzun müddət heç kim almaq istəməyib. Lakin itlə bağlı videolardan birinin təsadüfən sosial şəbəkələrdə paylaşılmasından sonra vəziyyət tamamilə dəyişib. Huahua qısa müddətdə böyük maraq doğuraraq internet məşhurlarından birinə çevrilib.

Nəticədə, 3 avqust 2026-cı ildə Huahuanın yeni sahibi onu 2 400 Çin yuanına, yəni təxminən 28 min rubla alıb.

Beləliklə, qeyri-adi görünüşü səbəbindən uzun müddət diqqətdən kənarda qalan Huahua sosial şəbəkələrin gücü sayəsində qısa müddətdə məşhurlaşaraq yeni sahibinə qovuşub.

//Gülnarə Abasova, Editor.az