Fitnes mütəxəssisi və “Lapino Fitness” klubunun həmtəsisçisi Emil Xalimov idman məşqləri zamanı film izləməyin həm gözlərə, həm də məşqin effektivliyinə mənfi təsir göstərdiyini bildirib. Onun sözlərinə görə, xüsusilə qaçış trenajoru və ya velotrenajorda məşq edərkən ekrana baxmaq orqanizm üçün əlavə yük yaradır.  

Editor.az bu barədə xarici mediaya istinadla xəbər verir.

Ekspert qeyd edib ki, insan qaçarkən və ya pedal çevirərkən bədən və baş daim hərəkətdə olur. Bu zaman gözlər kiçik və titrəyən ekranda görüntünü sabit saxlamağa çalışır ki, bu da göz əzələlərinin həddindən artıq işləməsinə səbəb olur. Nəticədə yarım saatlıq məşqdən sonra göz yorğunluğu, quruluq və narahatlıq hissi yarana bilər. Üstəlik, filmə diqqət cəmləndikdə göz qırpma sayı azalır və bu da gözlərin daha tez qurumasına gətirib çıxarır.  

Xalimovun sözlərinə görə, problem yalnız gözlərlə məhdudlaşmır. Beyin eyni anda həm fiziki hərəkətləri idarə etməyə, həm də filmin süjetini izləməyə çalışdığı üçün diqqət bölünür. Bu isə məşqin keyfiyyətini aşağı salır: insan fərqinə varmadan tempi azaldır, addımlarını qısaldır və ya trenajordakı yükü daha aşağı səviyyədə saxlayır. Nəticədə planlaşdırılmış intensiv məşq adi gəzintiyə çevrilə bilər.  

Mütəxəssis bildirib ki, məşq zamanı film əvəzinə musiqi dinləmək daha faydalıdır. Ritmik musiqi hərəkət tempini qorumağa kömək edir, yorğunluq hissini azaldır və yüksək intensivlikli məşqləri daha uzun müddət davam etdirməyə imkan verir. Podkastlar və audiokitablar isə uzunmüddətli, aşağı intensivlikli kardio məşqləri üçün uyğun seçim hesab olunur.  

Ekspert əlavə edib ki, bərpaedici və yüngül kardio məşqləri zamanı film izləmək mümkündür, lakin bunun üçün göz səviyyəsində yerləşən böyük və sabit ekran seçilməlidir. Telefonu əldə tutaraq məşq etmək isə duruşun pozulmasına, nəfəs alma ritminin dəyişməsinə və məşqin səmərəsinin azalmasına səbəb ola bilər.  

//Gülnarə Abasova, Editor.az