Avqustun 20-si Ümumdünya Tənbəllik Günü kimi qeyd olunur.
Editor.az xəbər verir ki, bu münasibətlə danışan psixoloq Kira Qoldşteyn bildirib ki, hərəkətsizlik və məhsuldarlığın müvəqqəti azalması hər zaman mənfi hal kimi qiymətləndirilməməlidir.
Mütəxəssisin sözlərinə görə, uzunmüddətli gərginlikdən sonra orqanizmə elə bir vaxt lazımdır ki, insan daim məhsuldar olmağa, qərarlar qəbul etməyə və hər dəqiqəsini şəxsi inkişaf üçün istifadə etməyə məcbur hiss etməsin.
Psixoloq xüsusilə sağlam istirahətlə prokrastinasiya, yəni işi davamlı olaraq təxirə salmaq arasında fərq qoymağın vacibliyini vurğulayıb.
Sağlam istirahət zamanı insan şüurlu şəkildə heç nə etməməyə qərar verir və bundan sonra özünü daha enerjili hiss edir. Prokrastinasiyada isə insan işi görmək istəyir və ya görməli olduğunu bilir, lakin səhv etmək qorxusu, mükəmməllikçilik və ya haradan başlayacağını bilməmək səbəbindən işi təxirə salır.
Qoldşteyn bu fərqi belə izah edib: sağlam istirahətdə insan özünə heç nə etməməyə icazə verir, prokrastinasiyada isə etmək istədiyi və ya etməli olduğu işin başlanğıcını daim ertələyir.
Mütəxəssis xəbərdarlıq edib ki, insan bütün günü istirahət etdikdən sonra özünü daha ağır və enerjisiz hiss edirsə, bunun səbəbi sadəcə tənbəllik olmaya bilər. Belə vəziyyət tükənmişlik sindromunun əlaməti ola bilər.
Tükənmişlik zamanı enerji azalır, insan işdən və gündəlik fəaliyyətlərdən uzaqlaşmağa başlayır, nəticədə effektivlik aşağı düşür. Belə hallarda mütəxəssisə müraciət etmək tövsiyə olunur.
Psixoloq həmçinin qeyd edib ki, sosial şəbəkələrdə iki saat vaxt keçirmək, eyni zamanda görüləsi işlər və ya buraxılmış görüşlər barədə narahat olmaq insanın real mənada dincəlməsinə kömək etmir.
Əgər insan həqiqətən yorulubsa, ən sadə həll yolu telefonu kənara qoymaq və sadəcə uzanıb dincəlmək ola bilər.
Qoldşteynin fikrincə, istirahət həyatın əksi deyil, onun ayrılmaz hissəsidir. İnsan daim özünü məhsuldar olduğunu və istirahətə layiq olduğunu sübut etməyə məcbur deyil.
Məqalədə daha əvvəl aparılan araşdırmaya da istinad edilir: Rusiyada insanların 67 faizi iş səbəbindən həyat üçün kifayət qədər vaxtlarının olmadığını bildirib.
//Gülnarə Abasova, Editor.az