Ukrayna Rusiya ərazisində hərbi və kosmik infrastruktura bağlı obyektlərə zərbələri gücləndirir. Forbes yazır ki, Kiyevin son hücumları müharibənin yeni istiqamətə — kosmik sənaye və hərbi-kosmik imkanlara qarşı mübarizəyə doğru genişləndiyini göstərir.

Editor.az xəbər verir ki, Nəşrin məlumatına görə, Ukrayna yalnız Rusiya hərbi aerodromlarını deyil, həm də ölkənin kosmik proqramının fəaliyyətini təmin edən müəssisə və tədqiqat mərkəzlərini hədəfə alır. ABŞ və Böyük Britaniyadan olan ekspertlər bu hücumları Rusiyanın hərbi məqsədlərlə istifadə etdiyi kosmik imkanlarını zəiflətməyə yönəlmiş kampaniyanın bir hissəsi kimi qiymətləndirirlər.

Avqustun ortalarında Ukraynanın Rusiyanın Samara vilayətində yerləşən “Progress” Raket-Kosmik Mərkəzinə zərbə endirdiyi bildirilmişdi. Peyk görüntülərində müəssisənin bəzi hissələrində zədələnmələr qeydə alınıb. Mərkəz “Soyuz” seriyalı raketlərin istehsalında mühüm rol oynayır.

Forbes-in istinad etdiyi ekspertlərin fikrincə, belə obyektlərin sıradan çıxarılması Rusiyanın raket istehsalı, peyk imkanları və hərbi rabitə sistemlərinə təsir göstərə bilər. Xüsusilə hərbi kəşfiyyat və cəbhədə istifadə olunan peyk məlumatlarının əhəmiyyəti nəzərə alındıqda, kosmik infrastruktur müharibənin strateji hədəflərindən birinə çevrilir.

Beləliklə, Rusiya-Ukrayna müharibəsində qarşıdurma artıq yalnız quru, hava və dəniz məkanları ilə məhdudlaşmır. Tərəflərin kosmik və peyk imkanlarını təmin edən yerüstü infrastruktura qarşı mübarizəsi müharibənin texnoloji xarakterini daha da gücləndirir.

//Samir Qurbanov, Editor.az