Rusiyanın əsas hava hücumundan müdafiə və raket əleyhinə sistemlərində istifadə olunan bəzi raketlərin ehtiyatı azalır. Bu barədə ABŞ-ın CBS News telekanalı Ukrayna rəsmilərinə istinadən məlumat yayıb.

Məlumata görə, Rusiya xüsusilə strateji obyektlərin və böyük şəhərlərin müdafiəsində istifadə olunan vacib zenit-raket sistemləri üçün sursat çatışmazlığı ilə üzləşir. Ukrayna tərəfi hesab edir ki, bu vəziyyət ölkənin Rusiyanın dərinliklərində yerləşən hərbi və sənaye obyektlərinə pilotsuz uçuş aparatları ilə daha çox zərbə endirməsinə imkan yarada bilər.

Ukraynalı rəsmilərin sözlərinə görə, son aylarda Ukraynanın pilotsuz aparatlarla həyata keçirdiyi hücumlar Rusiyanın hava hücumundan müdafiə sistemlərinə əlavə yük yaradıb və mövcud ehtiyatların sürətlə tükənməsinə səbəb olub.
Rusiya tərəfi isə bu məlumatlarla bağlı hələlik rəsmi açıqlama verməyib. Müstəqil mənbələr tərəfindən sözügedən iddiaların tam şəkildə təsdiqlənmədiyi də qeyd olunur.

Buna baxmayaraq, ekspertlər Ukraynanın uzaqmənzilli dron hücumlarının Rusiyanın hava müdafiə resurslarına ciddi təzyiq göstərdiyini bildirirlər.

//Samir Qurbanov, Editor.az