“Tesla” Çində təhlükəsizlik problemi aşkarlanan təxminən 3 milyon elektromobilini geri çağırır.

Bu barədə Çinin Bazarın Tənzimlənməsi üzrə Dövlət Administrasiyası (SAMR) məlumat yayıb.

Geri çağırılmanın əsas səbəbi avtomobillərin qəza zamanı qapılarının açılması ilə bağlı təhlükəsizlik riskidir.

Məlumata görə, bəzi “Tesla” modellərində salondakı mexaniki qəza qapı tutacaqları interyerin rənginə yaxın olduğundan onları tapmaq və istifadə etmək çətinləşə bilər. Ağır qəza və avtomobilin elektrik sisteminin sıradan çıxması zamanı bu hal sərnişinlərin avtomobildən tez çıxmasına və kənardakı şəxslərin onları xilas etməsinə mane ola bilər.

Geri çağırılma 2019-cu ilin martından 2026-cı ilin aprelinədək istehsal olunan 973 156 ədəd “Model 3” və 1 956 713 ədəd “Model Y” avtomobilinə, həmçinin idxal edilən “Model 3”, “Model X” və “Model S” modellərinə şamil edilir. Ümumilikdə bu kampaniya 2,97 milyondan çox avtomobili əhatə edir.

“Tesla” problemin aradan qaldırılması üçün avtomobillərə pulsuz xəbərdarlıq stikerləri yapışdıracaq. Şirkət, həmçinin OTA vasitəsilə proqram təminatını yeniləyərək qəza zamanı avtomobilin şüşələrinin avtomatik aşağı salınması funksiyasını təkmilləşdirəcək.

Bundan başqa, şirkət Çində 2,74 milyon “Model 3” və “Model Y” avtomobilini də geri çağırıb. Bu dəfə problem sürücünün diqqətinə nəzarət sistemi ilə bağlıdır. Yeniləmə nəticəsində salondakı kamera sürücünün diqqətini daha yaxşı izləyəcək və zəruri hallarda xəbərdarlıq edəcək.

Reuters-in məlumatına görə, “Tesla”nın geri çağırması Çində bir neçə avtomobil istehsalçısının ümumilikdə təxminən 4,3 milyon elektromobili əhatə edən rekord kampaniyasının bir hissəsidir. Çin 2027-ci ildən gizli tipli qapı tutacaqlarının istifadəsini də qadağan etməyə hazırlaşır.

Beləliklə, qapı tutacaqları ilə bağlı problem “Tesla”nın Çində indiyədək üzləşdiyi ən böyük geri çağırmalardan birinə səbəb olub.

KONKRET.az