Diabet xəstələrinin görmə qabiliyyətini qoruması üçün siqaretdən imtina etməsi vacibdir. Siqaret çəkən diabet xəstələrində diabetik retinopatiyanın inkişaf riski əhəmiyyətli dərəcədə artır.

Editor.az xəbər verir ki, bu barədə həkim İqor Loskutov açıqlamasında bildirib.

Onun sözlərinə görə, şəkərli diabet dünyada qarşısı alına bilən görmə itkisinin əsas səbəblərindən biri olaraq qalır. Diabet xəstələrinin təxminən üçdə birində tor qişanın damarlarının zədələnməsi ilə xarakterizə olunan diabetik retinopatiya inkişaf edir.

Loskutov qeyd edib ki, retinopatiyanın yaranmasına yaş, irsi meyillilik və diabetin davametmə müddəti kimi amillər təsir göstərir. Bununla yanaşı, xəstənin nəzarət edə biləcəyi risk faktorları da mövcuddur. Bunlara siqaret çəkmək, qidalanma və fiziki aktivlik daxildir.

Həkimin sözlərinə görə, siqaretin zərərli təsiri tütün tüstüsünün tərkibindəki çoxsaylı toksik maddələrlə əlaqədardır. Bu maddələr orqanizmdə qan dövranını və mikrosirkulyasiyanı poza, oksidləşdirici stresi artıra və göz toxumalarının qidalanmasını pisləşdirə bilər. Nəticədə diabet xəstələrində retinopatiyanın inkişaf riski yüksəlir.

Loskutov vurğulayıb ki, siqaretdən tamamilə imtina diabetik retinopatiyanın qarşısının alınması baxımından mühüm addımlardan biridir. Güclü nikotin asılılığı olan şəxslərdə isə siqareti tərgitmə prosesi həkim nəzarəti ilə həyata keçirilə bilər.

Həkim diabet xəstələrinə qan şəkərinin səviyyəsinə nəzarət etməyi, sağlam qidalanma və fiziki aktivliyə diqqət yetirməyi, həmçinin mütəmadi olaraq göz müayinəsindən keçməyi tövsiyə edib. Görmə qabiliyyətində hər hansı dəyişiklik və ya yeni şikayət yaranarsa, həkimə müraciəti gecikdirmək olmaz.

//Gülnarə Abasova, Editor.az