ABŞ kəşfiyyat orqanları hesab edir ki, İran istənilən vaxt Hörmüz boğazında gəmiçiliyi məhdudlaşdıra və ya boğazı bağlaya bilər.

Bu barədə Amerikanın nüfuzlu xəbər kanalı məlumat yayıb.
Məlumata görə, İran əvvəllər ABŞ ilə gərginlik dövründə strateji əhəmiyyət daşıyan Hörmüz boğazında nəqliyyat axınına təsir göstərmək imkanlarını nümayiş etdirib. ABŞ kəşfiyyatının qiymətləndirməsinə əsasən, Tehran zərurət yaranacağı təqdirdə bu addımı yenidən ata bilər.

Ekspertlər qeyd edirlər ki, dünya üzrə dəniz yolu ilə daşınan neftin əhəmiyyətli hissəsi məhz Hörmüz boğazı vasitəsilə nəql olunur. Buna görə də boğazın bağlanması qlobal enerji bazarlarında ciddi qiymət artımına və tədarük zəncirində problemlərə səbəb ola bilər.

Hazırda İran rəsmiləri tərəfindən boğazın bağlanması ilə bağlı rəsmi qərar açıqlanmayıb. Lakin bölgədə artan gərginlik fonunda bu məsələ beynəlxalq ictimaiyyətin diqqət mərkəzində qalır.

//Samir Qurbanov, Editor.az