Hörmüz boğazının cənubunda dəniz minası ilə təmasda olduğu bildirilən neft tankerində yanğın baş verib. Hadisə ilə bağlı məlumatı İran İnqilab Keşikçiləri Korpusunun Hərbi Dəniz Qüvvələri yayıb.

Editor.az-ın İranın Fars xəbər agentliyinə istinadən verdiyi məlumata görə, İran tərəfi insidentin tanker dəniz minasına toxunduqdan sonra baş verdiyini iddia edir.

İran rəsmilərinin açıqlamasına əsasən, gəmi naviqasiya və radar sistemlərini söndürüb, həmçinin icazəsiz marşrut üzrə hərəkət edib. Bildirilir ki, mina ilə təmas nəticəsində tankerdə yanğın başlayıb.

İranın Tasnim xəbər agentliyinin yaydığı məlumata görə, tanker 2 milyon bareldən çox xam neft daşıyıb. Bu həcmdə neftin daşındığı gəmidə baş verən insident mümkün ekoloji fəsadlarla bağlı da suallar yaradıb.

Hələlik hadisə zamanı xəsarət alanların olub-olmadığı, tankerin hansı şirkətə və ya ölkəyə məxsus olduğu barədə ətraflı məlumat açıqlanmayıb. Eyni zamanda, mümkün neft sızmasının baş verib-vermədiyi və ətraf mühitə dəyən zərərin miqyası da məlum deyil.

Hadisənin təfərrüatları ilə bağlı əlavə rəsmi məlumat verilməyib.

Qeyd edək ki, Hörmüz boğazı dünya enerji tədarükü baxımından strateji əhəmiyyətə malik dəniz marşrutlarından biridir. Bu ərazidə neft tankeri ilə bağlı baş verən insidentlər beynəlxalq enerji daşımaları və dəniz təhlükəsizliyi baxımından xüsusi diqqət doğurur.