Mabel Matiz kimi tanınan müğənni Fatih Karacanın “Ha Leylim” mahnısının sözləri və musiqi videosu ilə bağlı ittihamnamə hazırlanıb.

Editor.az-ın xəbərinə görə, prokurorlar Karaca üçün altı aydan üç ilədək həbs cəzası tələb ediblər.

Hazırlanmış ittiham aktında qeyd olunur ki, çoxsaylı insanın yerdə uzandığı və ya oturduğu açıq hava məkanında bəy qismində çıxış edən bir kişi ilə sarı kostyum geyinmiş və sarışın saçlı digər bir kişi görünüb; onlardan biri pencəyini çıxarıb və daha sonra hər iki kişi birlikdə rəqs edib.

Bildirilib ki, iştirakçılar əsasən qollarını və ombalarını hərəkətə gətirməklə təkrarlanan hərəkətlər icra edirdilər və videoda əvvəlcə yalnız musiqi səslənsə də, sonradan görüntülərə mahnı sözləri də əlavə olunmuşdu.

Qeyd olunub ki, klipin sonrakı hissələrində iki kişinin rəqsi və müxtəlif hərəkətləri diqqət mərkəzinə və əsas mövzuya çevrilmişdi; bundan əlavə, mahnı sözləri ilə müqayisədə məlum oldu ki, sözlər və görüntülər bir-birindən ayrı elementlər deyil, əksinə, həm vizual, həm də akustik baxımdan bir-birini tamamlayır. Nəticə etibarilə, ictimai əxlaqın qəbul edilmiş sərhədlərinin aşılması vurğulandı.

//Dəniz Pənahova, Editor.az