Türkiyənin Rusiyadan neft idxalı iyul ayında əhəmiyyətli dərəcədə azalıb. Avqustda isə tədarükün daha da azalacağı gözlənilir.

Buna səbəb Ukraynanın Rusiyanın Qara dəniz sahilindəki neft infrastrukturu və terminallarına həyata keçirdiyi dron hücumları nəticəsində ixracda yaranan fasilələrdir.

Reuters treyderlər və LSEG-in gəmiçilik məlumatlarına istinadən bildirir ki, Türkiyənin Rusiya limanlarından neft idxalı iyunda təxminən 1,2 milyon ton olduğu halda, iyulda 900 min tona qədər azalıb. Qara dəniz üzərindən tədarük isə 600 min tondan bir qədər çox olan göstəricidən 300 min tondan bir qədər yuxarı səviyyəyə düşüb.

Məlumatlara görə, avqust ayında Rusiyanın Qara dəniz limanlarından Türkiyəyə neft tədarükünün təxminən 200 min ton təşkil edəcəyi proqnozlaşdırılır. Hazırda Türkiyəyə CPC Blend və Urals markalı neft üzrə yeni tədarüklər planlaşdırılmayıb. 

İxracdakı problemlər Rusiyanın Novorossiysk limanına da təsir göstərib. Reuters-in məlumatına görə, avqustun 14-də Ukraynanın dron hücumundan sonra limandakı Şeskharis neft terminalında xam neft yüklənməsi dayandırılıb. Terminalın gündəlik emal və yükləmə gücü təxminən 700 min bareldir. 
Tədarük risklərini azaltmaq üçün Türkiyə neft mənbələrini şaxələndirməyə başlayıb.

Ölkənin Braziliya və Qayana kimi yeni mənbələrdən xam neft idxalını artırmağı planlaşdırdığı bildirilir.

Beləliklə, Qara dənizdə təhlükəsizlik vəziyyətinin pisləşməsi yalnız Rusiya neftinin ixracına deyil, həm də Türkiyənin enerji təchizatı marşrutlarına təsir göstərir.

//Samir Qurbanov, Editor.az