Ukrayna Futbol Assosiasiyası (UAF) milli komandaya yeni baş məşqçi təyin olunduğunu elan edib. Bu barədə qurumun rəsmi saytında məlumat verilib.

Andrea Maldera Ukrayna milli komandasının yeni baş məşqçisi olub. UAF İcraiyyə Komitəsi Milli Komandalar Komitəsinin tövsiyəsi əsasında italyan məşqçinin namizədliyini təsdiqləyib. Andrea Malderanın müqaviləsi iki illikdir və uzadılma imkanı var. Bu, Ukrayna milli komandasına əcnəbi məşqçinin rəhbərlik etdiyi ilk haldır.

Malderanın Ukrayna milli futbol komandasının baş məşqçisi kimi ilk oyunu 31 mayda Polşaya qarşı olacaq. Daha sonra italyan mütəxəssis təyinatından bəri ilk çıxışını Ukrayna dilində eedib: “Burada olduğum üçün çox xoşbəxtəm. Milli komandaya rəhbərlik etmək mənim üçün şərəfdir. Buna görə də Ukrayna üçün hər şeyi edəcəyəm. Ukraynaya eşq olsun!”
O, başqa variantlarının olduğunu, lakin bu təklifi aldıqda heç bir şübhəsinin olmadığını söyləyib. “Əlbəttə ki, futbolda qələbə qazanmaq məsələsində çox şeyin müxtəlif amillərdən asılı olduğunu başa düşürük. Bizim ambisiyalarımız var və komanda olaraq, azarkeşlərimizlə qarşılıqlı əlaqənin obyekti olacaq bir şey edə biləcəyimiz, daha inklüziv, pozitiv bir futbol üslubu yaratmağı hədəfləyirik. Ukrayna milli komandasının cəsarətli insanlardan ibarət bir komanda olmasını istəyirik. Bu, indi, hər zamankindən daha vacibdir. Əlbəttə ki, milli komandanın xalqın ruhunun əksi olduğunu başa düşürük”, – deyə Maldera bildirib.

O, milli komandanın əvvəlki məşqçilərinin işini qiymətləndirməkdən imtina edib. “Amma biz başa düşürük ki, qlobal səviyyədə vəsiqə qazanmaq olduqca çətin bir işdir. Biz futbola böyük sərmayə qoyan İtaliya haqqında danışdıq və bunun çətin olduğunu başa düşürük. Mən nail olmaq istədiyim şey rəqabət ruhunun inkişaf etdirilməsidir. Hamımız başa düşürük ki, Ukrayna futbolu obyektiv amillərə görə çox çətin dövrlərdən keçir. Bizə oyunçuların əllərindən gələni edə və mümkün qədər çox səy göstərə biləcəyi yarışlar lazımdır”, – deyə mütəxəssis əlavə edib.

//Samir Qurbanov, Editor.az