Üzün sağ və sol tərəfinin eyni sürətlə qocalmaması dermatologiyada yaxşı öyrənilmiş hadisələrdən biridir. Mütəxəssislərin fikrincə, buna yalnız yaşlanma prosesi deyil, insanın gündəlik həyat tərzi və xarici mühitin təsiri də səbəb olur.

Editor.az xəbər verir ki, rusiyalı dermatoloq, tibb elmləri doktoru Yuliya Qallyamovanın sözlərinə görə, üzün asimmetrik qocalmasının əsas səbəblərindən biri ultrabənövşəyi şüalara məruz qalmaqdır.

Həkim bildirir ki, dəridə görünən yaşlanma əlamətlərinin böyük hissəsi uzunmüddətli günəş təsiri ilə əlaqəlidir. Üzün bir tərəfi günəş şüalarına daha çox məruz qaldıqda həmin nahiyədə fotoqocalma prosesi daha sürətli gedə bilər. Avtomobil sürücülərində aparılan müşahidələr də bu fərqi göstərir: pəncərəyə yaxın olan üz tərəfində qırışlar, dərinin elastikliyinin azalması və tekstura dəyişiklikləri daha nəzərəçarpan ola bilər.

Mütəxəssisin qeyd etdiyi ikinci amil yan üstə yatmaqdır. İnsanların əksəriyyətinin yatmaq üçün üstünlük verdiyi tərəf olur. Uzun illər eyni tərəfdə yatmaq zamanı üz dərisi saatlarla yastığın təzyiqinə məruz qala bilər. Bu təkrarlanan mexaniki təsir dəridə qırışların və müəyyən asimmetriyaların yaranmasına və ya daha nəzərəçarpan olmasına səbəb ola bilər.

Üçüncü amil isə üz əzələlərinin qeyri-bərabər işləməsidir. Mimikada üzün bir tərəfi digərindən daha aktiv olduqda zaman keçdikcə bu fərq qaşların vəziyyətində, ağız-burun ətrafındakı qırışlarda və göz ətrafındakı xətlərdə özünü göstərə bilər.

Həkim əlavə olaraq siqaret çəkmə, dişləri sıxma və ya qıcama, düzgün olmayan bədən duruşu və peşə fəaliyyətinin də üzün yaşlanma prosesinə təsir göstərə biləcəyini vurğulayıb. Onun sözlərinə görə, yaşlanma prosesini tamamilə dayandırmaq mümkün deyil, lakin onu sürətləndirən amillərin təsirini azaltmaq olar.

//Gülnarə Abasova, Editor.az