Almaniyanın Baden-Vürtemberq əyalətində 2012-ci ildən etibarən yetkinlik yaşına çatmayan şəxslərin iştirak etdiyi 358 nikah qeydə alınıb. Bu nikahlardan yalnız səkkizi məhkəmənin qanuni qüvvəyə minmiş qərarı ilə ləğv edilib. Digər 350 halın isə fərqli yollarla başa çatdığı bildirilib.
Editor.az Euronews-a istinadən xəbər verir ki, məlumatlar Almaniya üçün Alternativ (AfD) partiyasının Baden-Vürtemberq əyalət parlamentindəki deputatları Nikolaos Boutakoglou və Emely Knorrun yazılı sorğusuna hökumətin verdiyi cavabda əksini tapıb.
Əyalətin Daxili İşlər Nazirliyinin açıqlamasına əsasən, müvafiq məlumatların qeydiyyatına Tübingen Regional İdarəsi cavabdehdir.
11 yaşlı qızın nikahı məhkəmə qərarı ilə ləğv edilib
Məhkəmə tərəfindən təsdiqlənmiş səkkiz ləğv qərarı 2018-2024-cü illər arasında qəbul olunub. Həmin hallar sırasında 11 yaşlı iraqlı qızın 17 yaşlı iraqlı oğlanla nikahı da yer alıb. Bu nikah 2020-ci ildə ləğv edilib.
2018-ci ildə isə 14 yaşlı əfqan qızın 30 yaşlı kişi ilə nikahına xitam verilib. 2024-cü ildə qəbul edilən iki qərar 16 yaşlı Almaniya vətəndaşı olan qızla 25 yaşlı pakistanlı kişinin, eləcə də 16 yaşlı suriyalı qızla 27 yaşlı suriyalı kişinin nikahlarını əhatə edib.
Deputat Nikolaos Boutakoglou sosial şəbəkədəki paylaşımında məsələni ciddi problem kimi qiymətləndirib və bu mövzunun cəmiyyətdə açıq müzakirə edilmədiyini iddia edib.
Nazirliyin məlumatına görə, aidiyyəti qurumun qeydiyyatına yalnız xarici ölkələrdə bağlanmış bu tip nikahlar daxildir.
Almaniyada Uşaq Nikahları ilə Mübarizə Qanunu 2017-ci ilin yayından qüvvədədir. Federal Parlament 2024-cü ildə xaricdə bağlanan nikahlarda yetkinlik yaşına çatmayan şəxslərin müdafiəsinə yönələn yeni qaydaları da qəbul edib.
350 nikah məhkəmə qərarı ilə ləğv edilməyib
Qeydə alınmış nikahların böyük hissəsinin məhkəmə qərarı olmadan başa çatması diqqət çəkir. Regional idarənin məlumatlarına əsasən, 2015-2026-cı illər ərzində 350 hal “digər üsullarla nəticələnmiş işlər” kateqoriyasında qeydə alınıb.
Əyalət hökuməti bu halların səbəbləri arasında tərəflərdən birinin vəfat etməsini, şəxslərdən birinin yetkinlik yaşına çatmasını, nikahın ləğvi üçün məhkəməyə müraciət edilməməsini və tərəflərdən birinin xaricdə yenidən evlənməsini göstərib.
Bu hallarda nikahlar məhkəmə qərarı ilə hüquqi baxımdan etibarsız sayılmayıb.
2023-cü ilin məlumatlarında 12 yaşlı əfqan qızın 21 yaşlı əfqan kişi ilə nikahı da yer alıb. Statistikada 13 və 14 yaşlı qızların nikahları ilə bağlı bir neçə qeydə də rast gəlinir.
Ən yeni məlumatlar 2026-cı ilə aiddir. Həmin qeydlərdə 16 və 17 yaşlı qızların yetkin kişilərlə bağladıqları nikahlar da göstərilib. Statistikada tərəflərin nikah zamanı yaşı və vətəndaşlığı ayrıca qeyd olunub.
Daxili İşlər Nazirliyi sorğuya cavab verilən tarixdə uşaq nikahlarının ləğvi ilə bağlı davam edən məhkəmə prosesinin olmadığını bildirib.
Deputat Emely Knorr isə sosial şəbəkədəki açıqlamasında uşaqların təhlükəsizliyinin, təhsil almaq imkanlarının və öz gələcəklərini müəyyənləşdirmək hüququnun qorunmasının vacibliyini vurğulayıb. O, məcburi nikahlara qarşı daha təsirli müdafiə tədbirlərinin görülməsinə çağırıb.
Məktəblilərin neçə nəfərinin risk altında olduğu bilinmir
Deputatlar məcburi nikahların uşaqların təhsilinə təsiri ilə bağlı da məlumat istəyiblər.
Əyalətin Təhsil Nazirliyi bu sahədə ayrıca statistikanın aparılmadığını açıqlayıb. Hökumət həmçinin qeydə alınan nikahların hansı ölkələrdə bağlandığı barədə tam məlumatın olmadığını bildirib.
Nikah zamanı tərəflərin yaşı və vətəndaşlığı mümkün ləğv proseslərində əhəmiyyət daşıdığı üçün qeydiyyata alınır.
Deputatlar Baden-Vürtemberqdə məktəblərdə təhsil alan və məcburi nikah təhlükəsi ilə üzləşən şagirdlərin YASEMIN məsləhət mərkəzinə nə qədər müraciət etdiyini də öyrənmək istəyiblər.
Daxili İşlər Nazirliyinin 9 sentyabr 2026-cı il tarixli cavabına görə, mərkəz müraciət edənləri oxuduqları məktəbə və ya sinfə əsasən qruplaşdırmır. Məlumatlar şəxslərin yaşı və müraciətin qeydə alındığı il üzrə sistemləşdirilir. Bu səbəbdən məhz məktəblilərə göstərilən məsləhət xidmətlərinin sayını dəqiq müəyyənləşdirmək mümkün deyil.
Bir il ərzində 80 nəfər məcburi nikah riski ilə üzləşib
YASEMIN məsləhət mərkəzi 2025-ci ildə ümumilikdə 271 müraciət üzrə iş qeydə alıb. Onlardan 80-də müraciət edən şəxslərin məcburi nikah riski altında olduğu müəyyənləşdirilib. Həmin 80 nəfərin 33-ü yetkinlik yaşına çatmayan şəxslər olub.
Bu 33 nəfərdən dördünün yaşı 12-dən aşağı, beşinin 12, ikisinin isə 13 olub.
Mərkəz məcburi nikah təhlükəsi ilə üzləşən şəxsləri digər müraciət edənlərdən ayrıca qiymətləndirsə də, onların məktəb vəziyyəti üzrə ayrıca təhlil aparmır.
Deputatların sorğusunun hazırlanmasına qadın hüquqlarını müdafiə edən Terre des Femmes təşkilatının 2026-cı ilin iyul ayının sonunda dərc etdiyi məlumatlandırıcı materialın da təsir etdiyi bildirilir. Müəllimlər üçün nəzərdə tutulan təcili tədbirlər siyahısında məcburi nikah riski ilə bağlı vəziyyətlərə diqqət çəkilib.
Almaniya qanunvericiliyinə əsasən, 14 yaşına qədər olan şəxslər uşaq, 14-18 yaş aralığında olanlar isə yeniyetmə hesab edilir. BMT-nin Uşaq Hüquqları Konvensiyasına görə isə 18 yaşına çatmayan hər kəs uşaq sayılır.
Almaniyada nikaha daxil olmaq üçün yetkinlik yaşına çatmaq tələb olunur. Məcburi evlilik də ölkənin Cinayət Məcəlləsində ayrıca cinayət əməli kimi müəyyən edilib.
Təxminən 11,24 milyon əhalisi olan Baden-Vürtemberq Almaniyanın ümumi 83,5 milyonluq əhalisinin 13,5 faizindən bir qədər az hissəsini təşkil edir.
\\ Aydan Bünyatova, Editor.az