Azərbaycanda yüksək nəticə göstərən gənclərin Prezident təqaüdünə layiq görülməsi onların akademik uğurlarının dövlət səviyyəsində qiymətləndirilməsinin mühüm göstəricilərindən biridir. Bu addım istedadlı gənclərin gələcək təhsil və inkişaf imkanlarını genişləndirməyə dəstək verir.
Editor.az xəbər verir ki, bunu Dövlət İmtahan Mərkəzinin (DİM) İdarə Heyətinin sədri Məleykə Abbaszadə sosial şəbəkə hesabında paylaşdığı açıqlamada bildirib.
Onun sözlərinə görə, bu il Prezident təqaüdünə namizədliyi irəli sürülən 102 gəncin 54-ü region məktəblərinin məzunudur. Onlardan 15 nəfəri kənd və qəsəbə məktəblərində təhsil alıb. Namizədlər arasında keçmiş məcburi köçkün rayonlarının məktəblərini təmsil edən 4 nəfər də var.
Məleykə Abbaszadə vurğulayıb ki, bu göstəricilər yüksək akademik nəticələrin yalnız paytaxt məktəbləri ilə məhdudlaşmadığını göstərir. Onun fikrincə, istedadlı gənclərin harada yaşamasından asılı olmayaraq biliklərini nümayiş etdirmələri və potensiallarını reallaşdırmaları üçün bərabər imkanların yaradılması vacibdir.
DİM sədrinin açıqlamasında ali məktəblərə qəbul imtahanlarının nəticələrinə də diqqət çəkilib. Belə ki, bu il 3 148 abituriyent 600 və daha yüksək bal toplayıb. Onların 1 811 nəfəri regionlarda yerləşən ümumi təhsil müəssisələrinin məzunlarıdır.
Bildirilib ki, yüksək bal toplayan gənclər ölkənin müxtəlif şəhər və rayonlarını, eləcə də kənd məktəblərini təmsil edirlər. Bu isə yüksək nəticələrin daha geniş coğrafiyada əldə olunduğunu göstərir.
Məleykə Abbaszadə qeyd edib ki, gənclərin biliklərinin obyektiv qiymətləndirilməsi və nəticələrinə uyğun imkanlar əldə etməsi təhsil sistemində ədalətin təmin olunması baxımından xüsusi əhəmiyyət daşıyır.
Dövlət İmtahan Mərkəzi yüksək nəticə əldə edən abituriyentlərin təcrübəsini öyrənmək və onların uğur hekayələrini digər gənclərlə bölüşmək istiqamətində də fəaliyyət göstərir. Bu məqsədlə 600 və daha yüksək bal toplayan abituriyentlər haqqında məlumatlar “Abiturient” jurnalının rəsmi saytında ayrıca bölmədə təqdim olunur.
DİM sədri Prezident təqaüdünə layiq görülən gəncləri təbrik edərək onlara gələcək təhsil həyatlarında uğurlar arzulayıb.