Axşam saatlarında qəbul edilən qidalar yuxunun keyfiyyətinə birbaşa təsir göstərə bilər. Problemin səbəbi hər zaman həddindən artıq qida qəbul etmək olmur. Bəzi məhsullar sinir sistemini aktivləşdirir, digərləri isə həzm sisteminin daha intensiv işləməsinə səbəb olur. Nəticədə insanın yuxuya getməsi çətinləşə bilər.
Editor.az xəbər verir ki, bu barədə endokrinoloq və dietoloq, tibb elmləri namizədi Oksana Mixaleva bildirib.
Mütəxəssisin sözlərinə görə, yatmazdan əvvəl ilk növbədə tərkibində kofein olan məhsullardan uzaq durmaq lazımdır. Bir çox insan kofeini yalnız qəhvə ilə əlaqələndirsə də, tünd çay və şokoladın tərkibində də kifayət qədər kofein olur. Buna görə yuxuya getməkdə çətinlik çəkən şəxslərə bu məhsulları axşam saatlarında qəbul etməmək tövsiyə olunur.
Həkim ağır və yağlı qidaların da gecə istirahətinə mənfi təsir göstərə biləcəyini qeyd edib. Bunlara fastfud, qızardılmış yeməklər, yağlı ət növləri və müxtəlif souslar daxildir.
Belə qidaların həzmi daha uzun çəkir və nəticədə insan artıq yatmağa hazırlaşdığı vaxtda həzm sistemi aktiv şəkildə işləməyə davam edir. Bundan əlavə, yağlı qidalardan sonra mədədə ağırlıq, narahatlıq və ya qıcqırma yarana bilər ki, bu da gecə yuxusunun keyfiyyətini aşağı salır.
Mütəxəssis gec saatlarda həddindən artıq zülal qəbul etməyi də məsləhət görmür. Onun sözlərinə görə, axşam yeməyində çox miqdarda zülal olması həzm sisteminə düşən yükü artıra, ağırlıq hissinə səbəb ola və insanın daha tez yuxuya getməsinə mane ola bilər.
Dietoloq axşam yeməyinin əvvəlcədən planlaşdırılmasını və ideal olaraq yatmazdan 2–3 saat əvvəl qəbul edilməsini tövsiyə edib.
Həkimin sözlərinə görə, birbaşa yatmazdan əvvəl yemək həzm prosesinin aktivləşməsinə və maddələr mübadiləsində iştirak edən hormonların, o cümlədən insulin və qlükaqona bənzər peptidin ifrazına səbəb ola bilər. Bu isə orqanizmin gecə istirahətinə təbii şəkildə hazırlaşmasına mane ola bilər.
Nəticə olaraq, yuxu keyfiyyətini qorumaq üçün axşam saatlarında kofeinli içkilərdən, şokoladdan, yağlı və ağır yeməklərdən, eləcə də həddindən artıq zülallı qidalardan uzaq durmaq və axşam yeməyini yatmazdan bir neçə saat əvvəl qəbul etmək tövsiyə olunur.
//Gülnarə Abasova, Editor.az