Ermənistanın xarici işlər naziri Ararat Mirzoyan TRIPP layihəsi çərçivəsində çəkilməsi nəzərdə tutulan infrastruktur xətlərinin marşrutları ilə bağlı danışıb. Nazir bildirib ki, dəmir yolu istisna olmaqla, digər kommunikasiya xətlərinin hansı ərazilərdən keçəcəyi hələ dəqiqləşdirilməyib.

Editor.az xəbər verir ki, bu barədə Ermənistan mediası məlumat yayıb.

Ararat Mirzoyan parlamentin xarici əlaqələr komissiyasında TRIPP sazişi layihəsini təqdim edərkən Meğri ərazisində dəmir yolu xətti boyunca neft və ya qaz kəmərlərinin çəkilməsini real hesab etmədiyini deyib.

Nazirin sözlərinə görə, Araz çayı ilə qayalıqlar arasında yerləşən ərazi olduqca dardır və burada əlavə infrastrukturun inşası üçün imkanlar məhduddur. O qeyd edib ki, həmin hissədən sovet dövründə olduğu kimi, dəmir yolu və elektrik xətlərinin keçməsi mümkün görünür.

Bu səbəbdən digər kommunikasiya xətlərinin fərqli marşrutlar üzrə çəkilməsi variantı nəzərdən keçirilə bilər. Mirzoyan vurğulayıb ki, söhbət yalnız Ermənistanın Sünik bölgəsindən getmir.

Ermənistanın xarici siyasət idarəsinin rəhbəri neft kəmərinin ölkənin şimalından keçə biləcəyini də istisna etməyib. Bununla belə, onun sözlərinə görə, hələlik dəqiq marşrut müəyyənləşdirilməyib.

Mirzoyan layihənin əhatə edəcəyi ərazinin eni barədə danışmağın da hazırkı mərhələdə mümkün olmadığını bildirib. O, bunun səbəbini belə bir göstəricinin hələ müəyyən edilməməsi ilə izah edib.

Beləliklə, nazirin açıqlamasından aydın olur ki, TRIPP çərçivəsində dəmir yolu və elektrik xətlərinin marşrutu ilə bağlı müəyyən təsəvvür olsa da, neft və qaz kəmərlərinin hansı istiqamətdən keçəcəyi hələ açıq qalır.