Rusiyadan Azərbaycana və bir sıra digər ölkələrə nağd rus rublunun çıxarılmasına məhdudiyyət qoyulub. Yeni qaydalara əsasən, fiziki şəxslər 1 milyon rubldan artıq nağd vəsaiti Rusiyadan çıxara bilməyəcəklər.

Editor.az-ın məlumatına görə, bu barədə Ermənistan Dövlət Gəlirləri Komitəsi açıqlama yayıb.

Məhdudiyyət təkcə Azərbaycana deyil, Avrasiya İqtisadi İttifaqına üzv olan Ermənistan, Belarus, Qazaxıstan və Qırğızıstana, eləcə də Tacikistan və Özbəkistana nağd rubl aparılmasına da aiddir.

Qaydalar şəxslərin statusuna görə fərqlənir.

Fiziki şəxslər üçün: Rusiyadan 1 milyon rublu aşan nağd vəsaitin çıxarılmasına icazə verilmir.

Hüquqi şəxslər və fərdi sahibkarlar üçün: Məbləğdən asılı olmayaraq, nağd rus rublunun ölkədən çıxarılması qadağan edilib.

Bununla belə, müvafiq fərmanda nəzərdə tutulan xüsusi istisnalar mövcuddur. Yəni müəyyən hallarda bu məhdudiyyət tətbiq edilməyə bilər.

Ermənistan Dövlət Gəlirləri Komitəsi Rusiyadan nağd pul aparmağı planlaşdıran şəxslərə səfərdən əvvəl qüvvədə olan tələbləri və istisnaları diqqətlə araşdırmağı tövsiyə edib.

Beləliklə, Rusiyadan Azərbaycana səfər edən və özü ilə nağd rubl gətirmək istəyən şəxslər üçün yeni məhdudiyyətlərə diqqət yetirmək vacibdir.